გამარჯობა,

პირველად მოხვდი აქ? გამოიწერე გამოცემა.

ჩემი ახალი YOUTUBE ვიდეო:

როგორ გვიშლის ხელს სმარტფონი წარმატების მიღწევაში?

გამარჯვება ადვილია

გამარჯვება ადვილია. ირგვლივ კონკურენცია იმაზე სუსტია, ვიდრე ერთი შეხედვით ჩანს.

ადამიანების უმეტესობას საქმეში შრომის ჩადება ეზარება.  თანამედროვე შეშლილ სამყაროში კომფორტის ზონიდან გამოსვლა სულ უფრო ნაკლებ ადამიანს შეუძლია.

ჩემს მეგობარს პოდკასტის გაკეთება სურს. ამის შესახებ დიდი ენთუზიაზმით დამელაპარაკა.

ყველაფერი ზუსტად აქვს გათვლილი. პირველი ათი სტუმრის სიაც კი გაწერილი აქვს.

თუმცა, ვერ დგამს ნაბიჯს. შიშები აქვს.

ხომ იცი, როგორ მიყვარს ხალხის შთაგონება. ეგრევე ეს სტატისტიკა მოვუყვანე:

,,მსოფლიო პოდკასტების 90% სამი გადაცემის შემდგომ ქრება. 99% კი - 20 გადაცემის შემდეგ’’.

ანუ, მსოფლიო პოდკასტერების TOP 1 %-ში რომ მოხვდე, სულ რაღაც 21 ეპიზოდის გაკეთება გჭირდება.

ცნობისთვის - დღეს მსოფლიოში პოდკასტების ბუმია. უაღრესად საინტერესო და სარფიანი სფეროა.

ბუნებრივია იფიქრებ, რომ კონკურენცია დიდია და წარმატების მიღწევა გაჭირდება.

თუმცა, აგერ სტატისტიკა. ციფრები არ ტყუიან. პოდკასტერების 99% ოცი ეპიზოდის შემდეგ ყრის ფარ-ხმალს.

დარწმუნებული ვარ, ეს ანალოგია ბევრ სხვა სფეროშიც გამოდგება. ადამიანების უმეტესობა ,,დარბილებულია’’.

ელემენტარულ წინაღობას ვერ უძლებენ.

ამიტომაც, მჯერა, რომ მცირედი ძალისხმევით და ყოველდღიურად ჩვენი გასაკეთებელის გაკეთებით, გამარჯვებამ არ უნდა დააგვიანოს!

შთაგონება როჯერ ფედერერისგან

ნაწყვეტი როჯერ ფედერერის ერთერთი ინტერვიუდან:

,,სრულყოფილება შეუძლებელია.

ჩემი კარიერის განმავლობაში ნათამაშები 1526 მატჩიდან, თითქმის 80% მოვიგე.

ახლა კითხვა მაქვს თქვენთან. თქვენი აზრით, ჩაწოდებების რამდენი პროცენტი მაქვს მოგებული? პასუხია - 54%.

სხვა სიტყვებით რომ გითხრათ, ჩოგბურთის TOP მოთამაშეებიც კი ყოველ მეორე ჩაწოდებას აფუჭებენ.

როდესაც ყოველ მეორე ჩაწოდებას აცუდებ, სწავლობ ერთ რამეს - არ ჩაიციკლო მარცხზე. შენს თავს ეუბნები - მე დავმარცხდი... ეს მხოლოდ ერთი ქულაა. ბადეს მოვარტყი... ეს მხოლოდ ეს ქულაა. ჩემი საუკეთესო ჩაწოდებაც, რომელიც ESPN-ის TOP 10 საუკეთესო ჩაწოდებაში მოხვდა, კი მხოლოდ ერთი ქულაა.

რატომ გეუბნებით ამ ყველაფერს? როდესაც ბურთს აწვდი, ეგ მომენტი შენთვის ყველაზე მნიშვნელოვანი რამ უნდა იყოს და არის კიდეც. თუმცა, როდესაც ეს მომენტი დასრულდება, ის უკვე წარსულია და იქვე უნდა დატოვო.

აზროვნების ეს პარადიგმა უმნიშვნელოვანესია, რადგანაც განთავისუფლებს და საშუალებას გაძლევს მომდევნო ჩაწოდებაზე უფრო ინტენსიურად, კონცენტრირებულად და დაწმენდილი გონებით იფიქრო.

რთული სიტუაციების დაძლევის ოსტატი უნდა გახდე. ზუსტად ეს არის ჩემპიონის მენტალობა.

ჩემპიონი არ ხდები იმის გამო, რომ ყველა ჩაწოდება მოიგე. ჩემპიონი ხდები იმიტომ, რომ მარცხდები, შემდგომ ისევ მარცხდები და მარცხთან გამკლავებას სწავლობ. იღებ მას. თუ საჭიროა დაიყვირებ კიდეც და ღიმილით უბრუნდები საქმეს’’.

კვირის ფრაზა

,,დამოკიდებულება უფრო მნიშვნელოვანია, ვიდრე ფაქტები. რაც უნდა ფაქტის წინაშე აღმოჩნდეთ, რაც უნდა უიმედოდ იყოს საქმე, უფრო მნიშვნელოვანი მაინც თქვენი დამოკიდებულებაა ამ ფაქტის მიმართ. მომხდარზე ფიქრმა შესაძლოა, მანამდე დაგცეთ, ვიდრე მის წინააღმდეგ რაიმე ზომას მიმართავდეთ. თუ ნებას მისცემთ, ნებისმიერი გასაჭირი დაგჯაბნით, სანამ მის აღმოსაფხვრელად რაიმეს მოიმოქმედებდეთ.’’

ნორმან პილი

კვირის აღმოჩენები

• 25 შთამაგონებელი ფრაზა

• 2 საათიანი ვიდეო სტოიციზმის შესახებ

აბა დროებით!

ომარ ნოე წერეთელი ❤️‍🔥 

P.S. რას ფიქრობ ფედერერის ნათქვამზე? ჩემი აზრით, ფენომენალური პასუხია. მარცხში არის რაღაც დიდებული. მგონი, გამარჯვებულის აზროვნების პარადიგმა, სწორედ მარცხთან სათანადო გამკლავებით მიიღწევა.

შენ რას იტყვი? გამოუშვი პასუხი…

P.S.S. წინა გამოცემა თუ გამოგრჩა