N1 📚 26 ივნისის ნიუსლეთერი

ომარ ნოე წერეთელი
June 25, 2023 • კითხვის დრო:1 minute

მოგესალმებით,

გიზიარებთ თუ რა გადამხდა თავს წინა კვირაში საინტერესო. მაშ ასე, დავიწყოთ!

წიგნი, რომელიც წავიკითხე:

პოზიტიური აზროვნების ძალა ნორმან ვინსენტ ჰილის ავტორობით. ამ წიგნის შესახებ ბევრი არაფერი ვიცოდი. უბრალოდ, ბიბლუსში მოვკარი თვალი, მიმზიდველი სათაური ჰქონდა და ვიყიდე. თან ,,ლურჯი ოკეანის’’ გამოცემული იყო და მოკლედ, თავი ვერ ავარიდე.

ალბათ სათაურიდანვე მიხვდით, რომ პერსონალური განვითარების ჟანრს მიეკუთვნება. წიგნი არის ერთი დიდი პოზიტივი და სიკეთე. აი, კარგი აზრებით და ოპტიმიზმით რომ დაგმუხტავს ისეთია. ავტორი გულწრფელად ცდილობს მისი დიდი გამოცდილება ისე გადმოსცეს, რომ მკითხველისთვის იოლად გასაგები იყოს და ამასთანავე ერთი ამოსუნთქვით იკითხებოდეს.

5 ქულიდან ამ წიგნს დავუწერდი 3.5 ქულას. თუ რატომ 3.5 ამაზე რამდენიმე მიზეზი მაქვს. პირველ რიგში ავტორის შესახებ - ეს ადამიანი არის ამერიკელი პასტორი და ღვთისმეტყველი. შესაბამისად, წიგნი აგებულია ქრისტიანულ სწავლებაზე და სახარებისეულ ჭეშმარიტებებზე. თავისთავად ეს ფაქტი ჩემს თვალში წიგნს არანაირად არ აკნინებს, მაგრამ რიგი მკითხველისთვის შესაძლოა სენსიტიური თემა იყოს. რაც ძალიან არ მომწონს არის ის, რომ ავტორი სახარებას და მის მთელ რიგ ფრაზებს (ეპიზოდებს) საკმაოდ თავისებურად განმარტავს და ძალიან ყოფით დონემდე დაჰყავს. პირდაპირ ვიტყვი, რომ ქრისტიანობა და ქრისტეს სწავლება დაყვანილი ჰყავს რაღაც სურვილების ამსრულებელი მექანიზმის დონეზე და ქრისტიანობის აბსოლუტურ მისტიფიკაციას ახდენს. რაც არ მომეწონა.

სწორედ ამის გამო ვუწერ 3.5 ქულას. საბოლოო ჯამში წაკითხვად ნამდვილად ღირს და დარწმუნებული ვარ უამრავი თქვენგანი ისიამოვნებს ამ წიგნით.

პოდკასტი, რომელსაც მოვუსმინე:

გირჩევთ, ნამდვილად არ ინანებთ - ეს ქალი არის ცნობილი ბიზნესმენი და ენტერპრენერი. გვიზიარებს ძალიან საინტერესო და გამოსადეგ რჩევებს ფულთან და ბიზნესთან დაკავშირებით.

ანიმე, რომელსაც ვუყურე:

Grave of the Fireflies - მერამდენჯერ ვუყურე ამ ანიმეს აღარც ვიცი. საოცარი ნამუშევარია. აბსოლუტურად გირჩევთ რომ უყუროთ. ცრემლებსაც ბევრს დაღვრით. :(

კვირის მუსიკა:

სიმღერა, რომელიც ყოველთვის კარგ ხასიათზე მაყენებს - The Middle Jimmy Eat World.

ციტატა, რომელზედაც ვფიქრობ:

,,თუ ჩვევის ჩამოყალიბება გსურს, მთავარია, დაიწყო მისი ხშირი გამეორებით და არა სრულყოფით. აუცილებელი არ არის, ახალი ჩვევის თითოეული დეტალი გაწერო. მისი პრაქტიკაში განხორციელება გჭირდება. უბრალოდ, ხშირად გაიმეორე’’ - ჯეიმს ქლიერი ,,ატომური ჩვევებიდან’’. ეს იმას გულისხმობს, რომ პერფექციონიზმს თავი უნდა დავანებოთ. მთავარი არის დაწყება, კარგად თუ ცუდად მნიშვნელობა არ აქვს. ხარისხი პროცესში დაიდება.

სულ ეს იყო,

ყველას შესანიშნავ კვირას გისურვებთ!