გამარჯობა,

კვირას მეილი ვერ გამოვაგზავნე. ერთიანად ბევრი საქმე დამაწვა და ვეღარ მოვიცალე.

თან შაბათს ჯვრისწერა მქონდა. შეგიძლია მომილოცო 😅 

ჯვრისწერა იქით იყოს და გადავიდეთ საქმეზე.

კვირის დაკვირვება

მოტივაციის შესახებ კარგი რაღაც წავიკითხე დენიელ გოლმენის წიგნში (,,ემოციური ინტელექტი’’):

1988 წლის ოლიმპიადაზე ამერიკელი მოცურავე მეტ ბიონდი გამოდიოდა.

მთელი ქვეყანა გულშემატკივრობდა.

თუმცა, პირველივე გამოსვლა (200 მეტრზე თავისუფალი ცურვა) ჩააფლავა.

გულშემატკივარმა იფიქრა, რომ ეს მარცხი მეტს ფსიქოლოგიურად გატეხდა და შემდეგ სახეობებშიც ბევრს ვერაფერს გააკეთებდა.

თუმცა, მომდევნო ხუთ სახეობაში მეტმა წნეხი დაძლია და მაქსიმუმი დადო - 5 ოქროს მედალი.

მთელი ამ პროცესის განმავლობაში, ერთერთი მაყურებელი, რომელიც დარწმუნებული იყო, რომ მეტი თავს მოერეოდა და შედეგს დადებდა, გახლდა პენსილვანიის უნივერსიტეტის პროფესორი ფსიქოლოგი მარტინ სელიგენი.

სპორტსმენისადმი რწმენა პროფესორს ესე ჰაერიდან არ გასჩენია.

წლის დასაწყისში პროფესორმა სპორტსმენი შეამოწმა ე.წ. ოპტიმიზმის ტესტზე, სადაც მეტმა უმაღლესი შედეგი აჩვენა.

დენიელ გოლმენი წერს:

,,ოპტიმიზმი, იმედის მსგავსად, გულისხმობს შეურყეველ მოლოდინს, რომ ცხოვრებაში, საერთო ჯამში, ყველაფერი უკეთესად იქნება, წარუმატებლობისა და იმედგაცრუების მიუხედავად. ემოციური ინტელექტის თვალსაზრისით, ოპტიმიზმი პოზიციაა, რომელიც ადამიანს მძიმე განსაცდელის დროს აპათიის, უიმედობისა და დეპრესიისგან იცავს, და მისი უახლოესი ,,ნათესავის’’, იმედის მსგავსად, ოპტიმიზმი ადამიანის ცხოვრებაში დივიდენდის სახით ბრუნდება’’.

აქედან გამომდინარე, ოპტიმიზმი შესაძლოა ერთერთი ეფექტური იარაღი იყოს მოტივაციის ასამაღლებლად!

ოპტიმიზმი განსაზღვრავს თუ როგორ ავხსნით ჩვენს წარმატებას/წარუმატებლობას.

და რაც მთავარია, სწორედ ოპტიმიზმა უნდა განსაზღვროს მარცხის შემდგომ ჩვენი მოქმედებები.

სწორედ ოპტიმიზმა უნდა დაბადოს მოტივაცია და გადავდგათ შემდეგი ნაბიჯი.

ოპტიმისტი ადამიანი მარცხის დროს ფარ-ხმალს არ დაყრის. მარცხიდან ისწავლის. გეგმას დასახავს თუ რა უნდა მოიმოქმედოს იმისათვის, რომ შემდეგში შედეგი დადოს.

და რას აკეთებს პესიმისტი? ცხვირს ჩამოუშვებს. მის წარუმატებლობას ისეთ რამეს დააბრალებს, რომელზეც მას გავლენა არ აქვს - ამინდს, მთავრობას, მეზობელს, მშობლებს, ნათესავებს. მიზეზი არ გამოელევა.

როგორც გოლმენი წერს:

,,პესიმისტები მარცხზე რეაგირებენ იმგვარად, რომ ვერაფერს მოიმოქმედებენ, რათა სხვა დროს საქმე უკეთ წაუვიდეთ, ამიტომ არც არაფერს აკეთებენ პრობლემის მოსაგვარებლად. მათთვის მარცხი გარდაუვალი შედეგია რაღაც პიროვნული ხარვეზის, რომელიც მუდამ თან სდევს’’.

კარგი ამბავი ის არის რომ ოპტიმიზმიც და პესიმიზმიც დასწავლადია. პრაქტიკით და მოქმედებით ხასიათის გამოწრთობა შესაძლებელია. ფსიქოლოგები ამას,,თვითეფექტიანობას’’ ეძახიან.

სტენფორდის უნივერსიტეტის პროფესორი ალბერტ ბანდურა ამბობს:

,,ადამიანების მოსაზრებას საკუთარი უნარ-ჩვევების შესახებ უზარმაზარი გავლენა აქვს ამ უნარ-ჩვევებზე. უნარი არ არის ფიქსირებული თვისება. თქვენს ქმედებებს გასაოცარი ცვალებადობა ახასიათებს. თვითეფექტიანობის უნარის მქონენი მარცხის შემდეგ მალევე მოდიან გონს. გარემოებებს აფასებენ იმის მიხედვით, მათ როგორ უნდა გაუმკლავდნენ, და არ წუხან იმაზე, რომ რაღაც შეიძლება არ გამოუვიდეთ’’.

კიდევ ერთხელ - ოპტიმიზმიც და პესიმიზმიც დასწავლადია. რომელ მხარეს ავირჩევთ ჩვენზეა დამოკიდებული.

კვირის ვიდეო

კვირის ფრაზა

,,ერიდეთ ზედმეტ ზრუნვას ფულზე, თანამდებობასა ან დიდებაზე. ერთ დღეს შეხვდებით ადამიანს, რომელიც არცერთი ამათგანით არ ინტერესდება. მაშინ მიხვდებით, რამდენად ღარიბი ხართ’’

რადიარდ კიპლინგი

პ.ს. რას იტყვი დღევანდელ გამოცემაზე? ოპტიმიზმის და პესიმიზმის გზაგასაყარზე საით დგეხარ?

მაგალითად, მე დიდი ხანი პესიმიზმისკენ ვიყავი გადახრილი. ოღონდ ისე, რომ ვერც კი ვაცნობიერებდი ამას. გამოუშვი პასუხი.

პ.ს.2. ჩარლი მანგერის 10 გამონათქვამი

პ.ს.3. ესეც ჩემი ჯვრისწერა ❤️‍🔥