N3 📚 1-ლი ივლისის ნიუსლეთერი

მოგესალმებით,

ამ ნიუსთელეთერში თქვენ ნახავთ:

• წიგნი, რომელსაც გირჩევთ (,,აწმყოს ძალა’’ ეკჰარტ ტოლეს ავტორობით );

• საინტერესო 11 წუთიანი ვიდეო;

• მაგარი პოდკასტი, რომელიც მინდოდა გამეზიარებინა;

• შთამაგონებელი ისტორია ჯეიმზ კამერონის ბიოგრაფიიდან;

• ფრაზა, რომელიც დაგაფიქრებთ.

წიგნი, რომელიც წავიკითხე:

,,აწმყოს ძალა’’ ეკჰარტ ტოლეს ავტორობით. ეს წიგნი მეორეჯერ წავიკითხე. პირველად მისი აუდიო ვერსია მოვისმინე (Audible-ზე) 2018 წელს და მახსოვს დიდი შთაბეჭდილება მოახდინა. მოგვეცა ბედნიერება და ქართულადაც ითარგმნა. სხვათაშორის მშვენიერი თარგმანი გამოვიდა. თარგმანზე ყურადღებას ვამახვილებ იმიტომ, რომ ისეთი წიგნია, სადაც ავტორი სპეციფიკურ ტერმინებს იყენებს და შესაბამისად, ცოტა რთულია ქართულად შესაფერისი სიტყვები მოძებნო ხოლმე. მაგრამ როგორც გითხარით, კარგი თარგმანია, აზრიანი, რაც წიგნის კითხვასაც აადვილებს.

ვინ არის ეკჰარტ ტოლე? ცოტა უცნაური კაცი კია. დაიბადა გერმანიაში, შემდგომ დიდ ბრიტანეთში გადავიდა საცხოვრებლად და იქ კემბრიჯის უნივერსიტეტში სწავლობდა. როგორც თავად ამბობს, 29 წლის ასაკში რაღაც უცნაურობა მოხდა მის თავს, რის შედეგადაც ის ,,განსხივოსნდა’’ და მისი ცხოვრება რადიკალურად შეიცვალა. ამ ,,განსხივოსნების’’ შემდგომ, ის გახდა ე.წ. სულიერი წინამძღოლი და დაიწყო სულიერების ქადაგება.

ზემოთ აბზაცში რაც დავწერე ვიცი ძალიან საეჭვოდ ჟღერს 😄 😄. მაგრამ აქ ერთი პრინციპი მოქმედებს - ,,წიგნი ყდით არ ფასდებაო’’. და ამას ისიც ემატება, რომ ავტორის ,,განსხივოსნება’’ საერთოდ არაფერ შუაშია წიგნთან. ანუ შეიძლება ამ ფაქტის არ გჯეროდეს (მე მაგალითად არ მჯერა არავითარი განსხივოსნების), მაგრამ ამასთანავე ძალიან გულთან ახლოს მოვიდეს ავტორის სწავლება და შეხედულებები.

რაზე ეს წიგნი? მოკლედ რომ ვთქვა სიმშვიდზე, ჰარმონიაზე, სიყვარულზე და საკუთარი თავის შეცნობაზე. ეკჰარტ ტოლე გვეუბნება, რომ ადამიანის გონებისთვის დამახასიათებელი ფიქრი (გინდაც პოზიტიური, გინდაც ნეგატიური) რეალურად ანომალიაა და არაბუნებრივი მდგომარეობა. ის გვასწავლის, რომ ადამიანისთვის ბუნებრივი მდგომარეობა არის სრული სიმშვიდე და სიწყნარე გონებაში, სადაც ერთი ფიქრიც კი არ მოძრაობს.

როგორც ავტორი ამბობს - ,,ის, რომ ფიქრს ვერ ვწყვეტთ, საშინელი სენია, მაგრამ ვერ ვხვდებით, რომ სენია, რადგან მისით ყველა ვიტანჯებით. ამიტომაც ნორმად ვთვლით’’.

ასევე, ეკჰარტს გასაოცარი დამოკიდებულება აქვს დროის ფენომენის მიმართ. მისი აზრით, არ არსებობს არც წარსული და არც მომავალი. ორივე მათგანი ადამიანის გონების მიერ გამოგონილი ილუზიაა. არსებობს მხოლოდ არსებული წამი, მხოლოდ აწმყო.

როგორც ავტორი ამბობს - ,,დრო ერთადერთი ფაქტორია, რომელიც უცვლელი რჩება. ცხოვრება არის აწმყო. არ არსებობს დრო, როდესაც თქვენი ცხოვრება არ იყოს აწმყო. ასეთი დრო არც მოვა’’.

სხვათაშორის აქ არ შეიძლება არ გაგვახსენდეს ანტიკური სიბრძნე და ლათინური ფრაზა: Carpe Diem - რომელიც ნიშნავს ,,მოწყვიტე დღე’’ ანუ დაიჭირე აწმყო, დაიჭირე დღევანდელი წამი, რადგანაც ის ერთადერთია რაც რეალურად გვაქვს.

ავტორი არცერთ რელიგიურ წარმომადგენლობას არ მიეკუთვნება. თუმცა, წიგნში მრავლად მოჰყავს მაგალითები როგორც სახარებიდან, ასევე, ბუდას ცხოვრებიდან. შესაბამისად, შეგვიძლია ვთქვათ, რომ მას ქრისტიანობიდან და ბუდიზმიდან ბევრი რამე აქვს გადმოღებული და სინთეზირებული.

მოკლედ, ნამეტანი კარგი საკითხავია რა. პატარა ინსტრუქციასავით რომ მოგცეთ: წიგნის პირველი ნაწილი სუპერ საინტერესოა; მე-2 ნაწილი, სადაც უკვე პირად ურთიერთობებზე საუბრობს, ჩემთვის ცოტა მოსაწყენი იყო; მე-3 ნაწილი კი, სადაც ისევ აწმყოს თემას უბრუნდება, ისევ საინტერესო ხდება. ასე, რომ თუ შუა ნაწილში ოდნავ გადაგღალათ წიგნმა, იცოდეთ, რომ ბოლოსკენ ისევ საინტერესო ხდება.

საინტერესო და მოკლე ვიდეო ეკჰარტ ტოლეს შესახებ:

აი ზემოთ რაზეც გესაუბრე ის ყველაფერი თუ გინდა 11 წუთში გაიგო და მიხვდე ვინ არის ეკჰარტ ტოლე და საერთოდ რა უნდა ამ კაცს, შეგიძლია ეს ვიდეო ნახო:

როგორც ვთქვი, 2018 წელს წავიკითხე (მოვუსმინე) პირველად ამ კაცის წიგნი მეთქი, მაგრამ კარგა ხნით ადრე ვიცოდი მისი საქმიანობის შესახებ მისი იუთუბ არხიდან (1.8 მილიონი გამომწერი ყავს). ზუსტად საჭირო დროს და საჭირო მომენტში გადავაწყდი შემთხვევით ამ ვიდეოს. კაი გვარიანი დეპრესია მქონდა და ზოგადად შფოთვები რა (Anxiety-ს რომ ეძახიან, ეხლა მოდაშია). ჰოდა, ეს ჩემი დეპრესია და შფოთვები რომ აღვკვეთე და აღვგავე პირისაგან მიწისა, მათ შორის ამ კაცის და ამ ვიდეოს (აი კონკრეტულად ამ ვიდეოს) დამსახურება იყო. 😄 

პოდკასტი, რომლის ყურებასაც გირჩევთ:

რახან ბიძია ეკჰარტის გარშემო ვტრიალებთ, პოდკასტსაც მის საპატივცემულოდ შევარჩევ და გირჩევთ, რომ უყუროთ (How Mindfulness Can Bring Balance to Your World | Eckhart Tolle | Rubin Report):

პ.ს. იშვიათად დადის ხოლმე პოდკასტებში ზოგადად და ეს ერთერთი იშვიათი ვიდეოა…

პ.ს. 2. როგორც უყურებთ ბევრ წყაროს ინგლისურენოვანს ვაზიარებ? რა ვქმნა, ვინც არ იცით ინგლისური უნდა მაპატიოთ. კარგი? 😪 

შთამაგონებელი ისტორია ჯეიმზ კამერონის შესახებ:

კანადელი რეჟისორი ჯეიმზ კამერონი არაერთი მაღალშემოსავლიანი ფილმის რეჟისორია (ტერმინატორი; ტიტანიკი; ავატარი). სანამ ფილმების გადაღებას დაიწყება, კემერონი სატვირთო ავტომობილის მძღოლი იყო. სარეჟისორო სკოლაშიც კი არ უვლია. ამის სანაცვლოდ კი, ყოველ უქმეებზე კალიფორნიის უნივერსიტეტის ბიბლიოთეკაში ნახავდით წიგნებში ჩაფლულს.

ჯეიმზი იხსენებს: ,,ესე ალალბედზე დამამთავრებელი კურსის სტუდენტების საკურსო ნაშრომს დავავლებდი ხელს, რომლებიც ფილმის გადაღებას ეხებოდა, და საფუძვლიანად ვსწავლობდი. სადისერტაციო ნაშრომებს კი ვაქსეროქსებდი და ბაინდერებად ვახარისხებდი. შესაბამისად, ისე გამოვიდა, რომ სულ რაღაც 120 დოლარად აუარებელი ცოდნა მივიღე საფილმო ინდუსტრიის შესახებ’’

ბოლოს მოვიდა დრო ეს ბაინდერები დაედო და ხელში კამერა დაეჭირა. ,,პირველად გადაღება რომ დავიწყე’’ იხსენებს კამერონი - ,,აღმოვაჩინე, რომ უზარმაზარი რაოდენობის თეორიული ცოდნა დამიგროვებია, მაგრამ 0 პრაქტიკა. დაახლოებით რომ წარმოიდგინოთ, ვგავდი ექიმის, რომელიც მის პირველ აპენდიციტის ოპერაციას აკეთებს და თან თვალწინ გადაშლილი წიგნი უდევს’’

მთავარი გაკვეთილი - ცხოვრების რაღაც ეტაპზე არის ქვების შეგროვების დრო. თუმცა, არ უნდა გამოგვრჩეს ამ ქვების სროლის დროც. ყურადღებით უნდა ვიყოთ და ნებისმიერი თეორიული ცოდნა პრაქტიკით უნდა დავაბალანსოთ

 ფრაზა, რომელიც დაგაფიქრებთ:

,,სისუსტის გამოჩენა და მარცხი ადვილია. ტვირთის მხრებიდან ჩამოხსნა, არაფერზე ფიქრი, არაფრის კეთება და არაფერზე დარდიც ადვილია. დღეს გასაკეთებელი საქმის სახვალიოდ გადადებაც ადვილია. უახლოესი დღეებისა და წლების დღევანდელ სიამოვნებაში გაცვლაც ადვილია. ადამიანი თავად ამბობს უარს წინსვლაზე, რადგან ეს რთულია’’ - ჯორდან პეტერსონი

დღეისთვის სულ ეს იყო. აბა შეხვედრამდე :)

ერთი მარტივი მოქმედებით შეგიძლია მხარი დამიჭერო და გვერდით დამიდგე, რათა გავაგრძელო წერა. მოიწვიე შენი მეგობარი, ვისზეც ფიქრობ რომ გამოადგება მსგავსი სიახლეები (გაუზიარე ქვედა ლინკი და ეგაა. 10 წამის თემაა):