გამარჯობა,

კვირის ჩანაწერების დღევანდელ გამოცემაში ნახავ:

• კვირის აზრი (ფსიქოლოგიური ექსპერიმენტი)

• კვირის ვიდეო (N3 წესი ჯორდან პეტერსონი)

• კვირის ფრაზა

• კვირის ფილმი (ძალიან მომეწონა)

• კვირის შეკითხვა

სანამ საქმეზე გადავალ, თხოვნა მაქვს: გაუზიარე ეს ნიუსლეთერი 1 ისეთ ადამიანს, რომელსაც ფიქრობ, რომ მოეწონება და გამოადგება. ამ ლინკით შეგიძლია მოიწვიო.

კვირის აზრი

80-იან წლებში ფსიქოლოგებმა ექსპერიმენტი ჩაატარეს, სადაც მონაწილეთა ნახევარს უთხრეს, რომ ვიზაჟისტი მათ სახეზე დაახატავდა დიდ ნაიარევს და შემდგომ გასაუბრებაზე უნდა შესულიყვნენ.

აღსანიშნავია, რომ გასაუბრების დაწყებამდე ეს ნახატი სახიდან თავისით ქრებოდა, თუმცა ამის შესახებ მონაწილეებმა არ იცოდნენ. ანუ ისინი გასაუბრების ოთახში შედიოდნენ იმ რწმენით, რომ სახეზე ნაიარევი კვლავ ჰქონდათ მიხატული.

ეხლა ეხდება საინტერესო:

ექსპერიმენტის მონაწილეებმა, რომლებსაც სჯეროდათ, რომ სახეზე ნაიარევი ჰქონდათ, აღნიშნეს, რომ მათ ინტერვიუერები განსხვავებულად ეპყრობოდნენ და დისკრიმინაციას ჰქონდა ადგილი.

აღნიშნეს, რომ დაუსვეს რთული კითხვები, ეპყრობოდნენ უხეშად და არაკომფორტულად აგრძნობინეს თავი.

ხოლო მონაწილეთა მეორე ნახევარს მსგავსი რამ არ დაუფიქსირებიათ.

მოკლედ რომ ვთქვათ, ადამიანის შინაგანმა რწმენამ, რომ მათ სახეზე ნაიარევი ჰქონდათ, გამოიწვია მათი სრულიად განსხვავებული დამოკიდებულება სამყაროსადმი.

ზუსტად ასევე შეიძლება განსაზღვრავდეს ჩვენს ცხოვრებას ჩვენში წლობით ჩაბეტონებული შეხედულებები ჩვენს შესახებ, რომლებიც შეიძლება სულ არ იყოს მართალი. უბრალოდ ჩვენ გვგონია, რომ მართალია.

ჩვენი შიშები და თვითიმიჯი აყალიბებს ჩვენს ინტერპრეტაციას სოციალური ურთიერთობების შესახებ.

რა წარმოდგენაც გვაქვს შინაგანად საკუთარ თავზე, ზუსტად იმავეს ვავრცელებთ გარესამყაროზე.

ზემოთ აღწერილ მაგალითზე კარგად ჩანს ე.წ. მსხვერპლის მენტალიტეტი. როდესაც ადამიანი თავის ხელმოცარულობას გარე ფაქტორებს აბრალებს. ყოველთვის ვიღაც არის დამნაშავე. თითი ყოველთვის სხვაგან არის გაშვერილი.

ამაზე საშინელი მდგომარეობა არაფერი მგონია. წარმოიდგინე რა დონის მავნე რაღაც არის ეს ე.წ. მსხვერპლის მენტალიტეტი.

ანუ გამოდის, რომ ინდივიდის წარუმატებლობაში ყოველთვის სხვა ადამიანი ან/და მოვლენები არის დამნაშავე.

ეს არის ყველაზე უმწეო და უსუსური მდგომარეობა. ეს ნიშნავს, რომ შენს ცხოვრებაზე შენ არ გაქვს კონტროლი და გავლენა.

ყველაფრის სასიკეთოდ შეცვლა რომც მოგინდეს, ვერაფერს აკეთებ იმიტომ, რომ თურმე შენს ცხოვრებაზე სხვა ადამიანს ან/და მოვლენას აქვს კონტროლი.

სინამდვილეში რეალობა რა თქმა უნდა სხვაგვარია.

ასეთი ადამიანი, როგორც წესი, საკუთარ თავს აჯერებს, რომ არაფრის შეცვლა არ შეუძლია, რადგანაც მასზე არაფერია დამოკიდებული.

სხვა სიტყვებით რომ გითხრა, მოსწონს ,,მსხვერპლის მდგომარეობა’’. მისთვის ეს ყველაზე მაგარი პოზიციაა, იმიტომ რომ ,,მსხვერპლის მდგომარეობის’’ საპირისპირო მხარე უკვე მოქმედებას ითხოვს და საკუთარ თავზე პასუხისმგებლობის აღებას. და ეგ ვის უნდა ეხლა?

მოკლედ მე მინახავს ესეთი ხალხი და საცოდაობაა მათი ყურება...

კვირის ვიდეო

ჯორდან პეტერსონისეული წესი N3 შემდეგნაირად გამოიყურება:

,,დაუმეგობრდი მათ, ვისაც თქვენთვის მხოლოდ საუკეთესო სურთ.’'

ამ წესის შესახებ ვიდეო ჩავწერე.

კვირის ფრაზა

,,ნურასდროს დაივიწყებ, რომ რაც იყო, იგივე არის, და რაც არის, იგივე იქნება მარად. შეხედე მთელ დრამებს თუ ცალკეულ ისტორიულ ეპიზოდებს, რომლებიც პირადი ცდითა თუ მემატიანეთა გადმოცემით იცი. სპექტაკლი ყველგან ერთი და იგივეა, იცვლებიან მხოლოდ მსახიობები’’

მარკუს ავრელიუსის ,,ფიქრებიდან’’

კვირის ფილმი

ეს დოკუმენტური ფილმი ვნახე და მომეწონა.

მოკლე შინაარსი: იაპონიაში ოკინავას კუნძულები ხომ გაგიგია? ეს კუნძულები გამორჩეულია იმით, რომ ადგილობრივები დიდხანს და ჯანმრთელად ცხოვრობენ.

100 წელს გადაცილებული ხალხის რაოდენობით მსოფლიოში N1 ადგილას არიან. .

ჰოდა, რა არის მათი საიდუმლო? ამის ამოხსნას ცდილობს ეს დოკუმენტური ფილმი.

კვირის შეკითხვა

არსებობს თუ არა შენს ცხოვრებაში რაიმე ისეთი მიზანი, რომლის მიღწევის შემთხვევაშიც, შენი ცხოვრება პოზიტიური კუთხით რადიკალურად შეიცვლებოდა?

თუკი ამ შეკითხვაზე პასუხი დადებითია და გაქვს ასეთი მიზანი, მინდა ულევი წარმატება გისურვო!

თუ პასუხი უარყოფითია და მსგავსი მიზანი ჯერჯერობით არ გაქვს დასახული, მაშინ რას ელოდები?

აბა დროებით,

ომარ ნოე წერეთელი

P.S. კითხვა მაქვს შენთან - თუ გეცლება ორი სიტყვით მომწერე რატომ გაქვს გამოწერილი ეს ნიუსლეთერი? სავარაუდოდ, მოგწონს. და რატომ მოგწონს? რას გაძლევს?

მადლობა!