კარგი ჩვევების გამომუშავების შესახებ

მეგობრებო მოგესალმებით! ❤️‍🔥 

პირველ რიგში, მსურს განსაკუთრებულად მივესალმო ახალ გამომწერებს და ჩვენი საზოგადოების ახალ წევრებს.

უკვე 280 + მეტნი ვართ და ეს მახარებს!

კეთილი იყოს თქვენი მობრძანება და სასიამოვნო კითხვას გისურვებთ.

რას ნახავთ ამ მეილში?

• ყველაფერი ჩვევების გამომუშავების შესახებ (დეტალური ინფორმაცია და ტექნიკები);

• დამატებითი მასალა ჩვევების გამომუშავების შესახებ;

• რა დავამუღამე ამ კვირაში?

გადავიდეთ პირდაპირ საქმეზე!

რა არის ჩვევა?

ჩვევა არის ისეთი ხასიათის ქმედება, რომელსაც ყოველდღიურად ვაკეთებთ. თუმცა, ჩვევის ეს განმარტება მხოლოდ ქმედების კომპონენტით არ უნდა შემოვსაზღვროთ.

საჭიროა ავტომატურობის ელემენტიც ჩავრთოთ. ანუ გამოდის, რომ ჩვევა არის ქმედება, რომელიც არის ყოველდღიური და რაღაც კუთხით ავტომატური.

კვლევების თანახმად, ჩვენი ყოველდღიურობის დაახლოებით 40%-ს ჩვევები შეადგენს. შენი დღის 40% რაღაცას თუ ,,უკავია’’, ეს იმას ნიშნავს, რომ ეს რაღაც ძალიან მნიშვნელოვანია.

მგონი, ყველა ვთანხმდებით, რომ ცუდ ჩვევებს აქვს ძალა ცხოვრებაში უკან დაგვხიოს და წაგვაქციოს, მაშინ როდესაც კარგ ჩვევებს პირიქით - გაგვაძლიეროს.

სწორედ ამიტომ, ამ მეილში მინდა ის საჭირო ინფორმაცია გავაზიარო, რომელიც ჩვევების შესახებ შევისწავლე და ყოველდღე ვიყენებ.

თან ეს ინფორმაცია მინდა იყოს მაქსიმალურად გასაგები და პრაქტიკული.

სხვა სიტყვებით რომ გითხრა, ჩემი მიზანი არის შემდეგი:

ამ მეილს თავიდან ბოლომდე როცა წაიკითხავ, მინდა ასე იფიქრო:

,,ვახ, ახლა უფრო გასაგებია ყველაფერი. თურმე რა მარტივად ყოფილა საქმე. ამ ჩვევების ფორმირებას ვცდილობ და უკეთესი ვერსია მინდა გავხდე ჩემი თავის. თურმე ყველაფერს თავისი ახსნა და მიდგომები აქვს. უბრალოდ აქამდე ამ კუთხით არ შემიხედავს. ამ ტექსტს რომ ვკითხულობდი, გულში გავიფიქრე ფურცელზე ყველა მაგარია-მეთქი, მაგრამ ბოლოსკენ გავაანალიზე რომ ეს ბიჭი უაზრო თეორიებს არ ,,აფრქვევს’’ და რეალურად პრაქტიკული გაკვეთილები დადო!’’

აბა წავედით!

ჩვევის სტრუქტურა

გვეუბნებიან, რომ ჩვევა სტრუქტურულად იყოფა სამ ნაწილად:

1. გარე სტიმულატორი;

2. რეაქცია სტიმულატორზე;

3. მიღებული ჯილდო.

დაიცა. რამე რთული არ გეგონოს. ავხსნათ მაგალითით:

თუ ერთსა და იმავე დროს ვჭამთ, დრო არის გარე სტიმულატორი, ჭამა არის ჩვენი რეაქცია სტიმულატორზე, მიღებული ჯილდო - ჭამისგან მიღებული სიამოვნება. ერთობლიობაში გამოდის ჩვევა.

სხვათაშორის, მე-3 ნაწილი (ჯილდო) ცოტა მამაძაღლი რამეა. ჩვევის სტრუქტურაში ხან ადვილი შესამჩნევია ჯილდო სად არის, ხანაც რთული.

მაგალითად: ჭამის შემთხვევაში საქმე მარტივად გვაქვს. როგორც ვთქვი, ჯილდო არის ჭამისგან მიღებული სიამოვნება.

მაგრამ, თუ ტელეფონს ხშირად ვიღებთ ხელში და ვსქროლავთ? ესეც ხომ ჩვევაა? ამ დროს ჯილდო შეფარულია. და მისი მიკვლევა მარტივი არ არის. აქ შესაძლოა ჯილდო ჩვენი თავიდან, ფიქრებიდან გაქცევა იყოს და შინაგანი სიცარიელის ამოვსება. მაგრამ ეს რთული და სხვა თემაა, ამიტომაც აქ არ გავაგრძელებ.

ეხლა კარგად მოვთელოთ თუ რა იგულისხმება გარე სტიმულატორში.

მაგალითად -  ხარ მწეველი. ანუ სიგარეტის მოწევა არის შენი ჩვევა.

ამ ჩვევის ,,ტრიგერი’’ (გამომწვევი მიზეზი) შესაძლოა იყოს შემდეგი გარე სტიმულატორები: საჭმლის დასრულება; ერთი კათხა ლუდის დალევა; ფინჯანი ყავით აივანზე გასვლა; დაინახე სხვა ადამიანი ეწევა; სტრესი; ნერვიულობა და ა.შ.

სწორედ გარე სტიმულატორი იწვევს ჩვევის განხორციელებას:

გარე სტიმულატორის ჩარევის შემდგომ ერთ ღერს მოსწევ (რეაქცია) და ჯილდოსაც მიიღებ - შენ ტვინი უფრო ,,დამშვიდებული’’ ხდება.

გილოცავ.

საბაზისო ინფორმაცია მიიღე. ახლა კარგი ამბავი მაქვს.

ზემოთ რაც ვილაპარაკე ნიშნავს იმას, რომ ჩვენ შეგვიძლია ჯანსაღი ჩვევების გამომუშავება დავისწავლოთ და სტრუქტურა ჩვენზე მოვირგოთ.

გავრცელებულია შეხედულება თითქოს ჩვევის ჩამოყალიბებას სჭირდება 21 დღე. ეს ტყუილია.

სინამდვილეში რა სჭირდება ჩვევის ჩამოყალიბებას:

გაიხსენე 3 შრიანი სტრუქტურა. კონცენტრირება უნდა მოვახდინოთ პირველ შრეზე ანუ გარე სტიმულატორზე.

დიახ. რამდენადაც არ უნდა გაგიკვირდეს პირველ რიგში მიზანში ვიღებთ გარემოს და არა თავად ქცევას.

რამდენი მცდელობა დაგვიხარჯავს იმაში რომ სწორი მოქმედება გვინდა განვახორციელოთ? ვაპირებთ ერთს, ვაკეთებთ მეორეს.

ეს იმიტომ ხდება, რომ არასწორად ვიწყებთ პროცესს. პირველ რიგში გარემო უნდა მოწესრიგდეს.

მაგალითად: გინდა ვარჯიშის ჩვევის გამომუშავება. იმის მაგივრად კონცენტრაცია მოახდინო თავად ვარჯიშის პროცესზე, სხვანაირად შეხედე სიტუაციას.

ვარჯიშის გარშემო შექმენი შენი მიკროსამყარო.

მაგალითად:

მონახე სტიმულატორი - სამსახურიდან შინ დაბრუნება. დაიწყე მარტივით - სამსახურიდან რომ მოხვალ ეგრევე ოთახში შედი და სავარჯიშო ტანსაცმელი ჩაიცვი. მერე სავარჯიშო ჩანთაც გადმოიღე და ბოტასებიც ჩაიცვი. ჩაიყენე შენი თავი ისეთ მდგომარეობაში, რომელიც ვარჯიშისკენ გიბიძგებს.

მალევე აღმოაჩენ, რომ ვარჯიშის ჩვევა გიყალიბდება და 3 შრიან სტრუქტურაში ჯდები: სტიმულატორი (სახლში მისვლა); რეაქცია (ოთახში შესვლა და სპორტულების ჩაცმა); ჯილდო (ვარჯიშიდან მიღებული სარგებელი).

აქ ერთ Pro ხრიკს გეტყვი.

ხანდახან ჯილდო შეიძლება იყოს გრძელვადიანი, ამიტომაც მოტივაცია რომ არ დაკარგო ჯილდო თავად უნდა შექმნა.

მაგალითად: ვარჯიშის მიმართ შესაძლოა ვიღაცას ჰქონდეს გრძელვადიანი ჯილდოს მოლოდინი. თუ ფორმაში ჩადგომა გინდა, ყველა ვარჯიშის შემდგომ შედეგს ვერ დაინახავ.

ამიტომაც, აქ საჭიროა ჯილდო გამოიგონო. ვთქვათ, ვარჯიშის დასრულების შემდგომ შენს თავს გაუმასპინძლდი გემრიელი პროტეინის ,,სნექით’’ ან რამე ტკბილეულით.

მე მაგალითად, არანაირი ჯილდოს გამოგონება არ მჭირდება ვარჯიშისთვის. თავად პროცესი და ვარჯიშიდან წამოსული შეგრძნებები არის ჯილდო.

დაიწყე მცირედით.

ახლა ვიცი ძალიან ნათელ რაღაცას ვამბობ, მაგრამ ბევრი სწორედ აქ ურევს.

მაგალითად, გინდა წონის დაკლება. არარეალური მოთხოვნები არ დაუყენო შენს თავს.

რეალისტური გეგმა შეადგინე. არსებობს ასეთი გამოთქმა, რომ თავიდან გეგმა იმდენად მარტივი უნდა იყოს, რომ საკუთარმა თავმა ,,მეზარება’’ არ გითხრას.

შენ თუ მიზნად დაისახავ თვეში 10 კგ-ის დაკლებას, შენივე დასახული მიზნიდან გამომდინარე სტრესი გაგჭყლეტს და გადაგახვევინებს გზიდან.

ჯორდან პეტერსონს აქვს ნათქვამი რუტინის შექმნა კი არის კარგიო, მაგრამ თუ ეს რუტინა შენსავე ტირანად გადაიქცევა უკვე კარგი აღარ გამოდისო.

შესაბამისად, დაიწყე მცირედით.

უფრო ზუსტად ქვემოთ ნახავ მცირედში თუ რამდენად მცირე იგულისხმება.

2 წუთის წესი.

გვეუბნებიან, რომ ახალი ჩვევის გამომუშავების პროცესი იმდენად უნდა გავამარტივოთ, რომ მას 2 წუთზე მეტი არ უნდა სჭირდებოდეს.

ორწუთიან მოდელზე თითქმის ყველა ჩვევის დაყვანა შეიძლება:

• წიგნის წაკითხვა ყოველ ღამით ძილის წინ აქციე ‘’ერთი გვერდის წაკითხვად’’

• 2 კმ-ის სირბილი აქციე ,,სპორტული ფეხსაცმლის თასმების შეკვრად’’

მუღამი ის არის, რომ ახალი ჩვევების გამომუშავებისთვის პირველი 2 წუთი უნდა იყოს უმარტივესი. შემდგომ შეიძლება გართულება.

ჩვევის გართულების მაგალითია:

მუდმივობა > იდეალურობა.

იდეალურობა კლავს.

კლავს ნებისმიერ წამოწყებას.

კლავს ნებისმიერ საქმეს.

თუ შეეცდები რაიმე იდეალურად აკეთო ეს ნიშნავს, რომ ვერაფერს გააკეთებ.

ჩვევის ჩამოყალიბების პროცესში თუ ელოდები, რომ ყველაფერი კარაქივით წავა, ძალიან ცდები.

ადვილი არაფერია. ჩვევის გამომუშავების გზაზე სირთულეები შეგხვდება და ამისთვის მზად უნდა იყო.

უფრო მეტიც, გზად გარანტირებულად იწვნევ მარცხს. უეჭველად გადაუხვევ გზიდან და ეგ ნორმალურია.

მთავარია წინ იარო და არა - იდეალურად იარო.

გამარჯვება მაინც მუდმივობას მოაქვს. ანუ რუტინას, რომელსაც მაინც გააკეთებ მიუხედავად დროებითი მარცხისა.

მუდმივობის იდეალური ახსნა:

,,როცა მგონია, არაფერი გამოვა, მივდივარ და ვუყურებ ქვისმთლელს, რომელიც ქვას ჩაქუჩს ურტყამს, შესაძლოა ასჯერაც, ისე, რომ ბზარიც კი არ ჩანს. აი, ასმეერთე დარტყმაზე ქვა ორად გადაიხსნება და ვიცი, რომ ეს არა ამ უკანასკნელი, არამედ ყველა იმ დარტყმი მოქმედების შედეგია, რომელიც მას წინ უსწრებდა’’.

შექმენი გარემო წარმატებისთვის.

ახლა რა მინდა დაგანახო.

ზემოთ ხომ გითხარი მწეველის მაგალითი, რომელიც გარემოს სტიმულაციით იწყებს ერთი ღერის მოწევას.

ანუ რა გამოდის, გარემოს სტიმულატორი მოქმედებს უარყოფითად და იწვევს მავნე ჩვევის განხორციელებას.

ეგრე არ არის? ეგრეა.

ხოდა გეკითხები, რა მოხდება იმ შემთხვევაში თუკი ახალი ჩვევის ჩამოყალიბების ეტაპზე გარემო სტიმულატორების შექმნაში აქტიურ ,,ხელოვნურ’’ ჩარევებს გავაკეთებთ?

ძალიან მაგარი რამე მოხდება.

გაგვიადვილდება გადაწყვეტილებების მიღება და ჩვევის გამომუშავების პროცესი უფრო მარტივი გახდება.

მაგალითად:

• თუ გინდა მეტი წყლის დალევის ჩვევა დანერგო, აიღე რამდენიმე ბოთლი წყალი, აავსე და ბინაში ყველა ოთახში დადე. ისე რომ თვალში ხშირად გხვდებოდეს და ადვილად ხელმისაწვდომი იყოს;

• თუ გინდა ჯანსაღი კვების ჩვევა დანერგო, საწყის ეტაპზე სახლიდან გააქრე ყველა მაცდუნებელი საკვები. მაცივარი გადააწყვე. ხილი ლამაზ კალათაში ჩაალაგე და გამოსაჩენ ადგილას დადე.

ამ ქმედებებით გაზრდი წვდომას სასარგებლო სტიმულატორზე და შეამცირებ მავნე სტიმულატორებს.

დაიმახსოვრე: ჩვენი გარემოს და პირადი სივრცეების გადაწყობა, კონტროლს გვიბრუნებს ჩვენს ცხოვრებაზე.

3 მთავარი ჩვევა.

პოზიტიური ჩვევების ჩამონათვალი რომ გავაკეთოთ ძალიან შორს წავალთ. ყველასთვის რაღაც იქნება ინდივიდუალური და სუბიექტური.

მიუხედავად ამისა, მე გამოვყოფდი 3 მთავარ ჩვევას, რომელიც უნივერსალურად საჭიროა ყველა ადამიანისთვის. დავარქვათ მათ უზენაესი ჩვევები.

ეს სამეული საბაზისოა ნორმალური ცხოვრებისთვის.

ღრმად მწამს, რომელიმე მათგანში თუ გარღვევა ექნება ადამიანს, ადრე თუ გვიან მძიმედ წამოარტყამს სადმე. ესენი არიან:

1. ძილის რეჟიმი;

2. ფიზიკური აქტივობა;

3. ჯანსაღი კვება.

ამათ აქ არ გავშლი. სხვა დროს ვისაუბრებ.

ასევე არ გეგონოს რაღაც სპარტანული ცხოვრების მომხრე ვიყო. არანაირად.

კვებაში მაგალითად 80/20 პრინციპი მომწონს. თუმცა ამაზე, როგორც ვთქვი აქ არ ვისაუბრებ.

თუ ამ სამიდან რომელიმე მათგანზე მაინც ფიქრობ, რომ არ არის მნიშვნელოვანი, პირდაპირ ვიტყვი, რომ გამოქვაბულში ცხოვრობ.

დამატებითი მასალა ჩვევების გამომუშავების შესახებ:

• უძლიერესი წიგნი კარგი ჩვევების გამომუშავების შესახებ (ქართულ ენაზე);

• ღრმა პოდკასტი ჩვევების შესახებ (ინგლისურ ენაზე);

• სტატია ჩვევების შესახებ (ინგლისურ ენაზე);

რა დავამუღამე ამ კვირაში?

რამდენიმე თვის წინ Xiaomi-ის აერო გრილი მაჩუქეს. თავიდან ცოტა ეჭვის თვალით ვუყურებდი.

მე, ადამიანმა, რომელსაც კულინარიაში ცოდნა 0-ს ქვემოთ მაქვს, მარტივად ავითვისე.

იოლია გამოსაყენებლად და რაც მთავარია დიდი ხნის სურვილი ავისრულე - მივირთვა საჭმელები, რომლებიც მომწონს ყოველგვარი ზეთის გარეშე.

კნაწუნა კარტოფილიდან დაწყებული, ღორის ხორცით დამთავრებული ყველაფერს იდეალურად მიწვავს ზეთის გარეშე.

ძალიან მომწონს და ყოველდღიურად აქტიურად ვიყენებთ მე და ჩემი ცოლი.

ჯანსაღი კვების ამბავში კარგი იარაღი შეემატა ჩემს არსენალს.

დღეისათვის სულ ეს იყო.

ისედაც საკმაოდ დიდი მეილი გამოვიდა.

P.S. კიდევ ერთხელ კეთილი იყოს ჩვენი ახალი გამომწერების შემომატება. იმედი მაქვს, მოგეწონათ მეილი. ❤️ 

თუ რაიმეს დაზუსტება გინდა, კითხვა გაქვს, შენიშვნა ან უბრალოდ მოწერა გინდა ჩემთვის, ამ მეილს პასუხი დაუბრუნე და ეგ არის. ყველა მეილს ყურადღებით ვკითხულობ და პასუხებსაც ვაბრუნებ.