🚀 როგორია ასიმეტრიული ცხოვრება?

გამარჯობა! ❤️‍🔥 

დღევანდელ მეილში ნახავ:

• რა არის ასიმეტრიული ცხოვრება?

• წიგნი, რომელსაც ვკითხულობ

• სერიალი, რომელიც მომწონს

• ფრაზა, რომელიც დაგაფიქრებს

რა არის ასიმეტრიული ცხოვრება?

ძალიან საინტერესო ვიდეოს წავაწყდი იუთუბზე. სტენფორდის უნივერსიტეტის ბიზნეს სკოლის ლექციათა ციკლია.

სპიკერი საუბრობს შემდეგ თემაზე - როგორ ვიცხოვროთ ასიმეტრიული ცხოვრებით?

ვისაც ინგლისური გესმით, გირჩევთ, აუცილებლად ნახოთ ვიდეო. მრავალი კუთხით შეუძლია დაგაფიქროთ და სასიკეთოდ შეგიცვალოთ მსოფლმხედველობა.

მე კი შევეცდები ვიდეოდან ის ძირითადი ასპექტები შემოგთავაზოთ, რომლებიც საინტერესოდ მომეჩვენა:

სპიკერი იმ კონცეფციას, რომელსაც ვიდეოში ხნის არქმევს ,,ასტიმეტრიულ ცხოვრებას’’ და გვეუბნება, რომ ასიმეტრიული ცხოვრება შედგება 4 ძირითადი საყრდენისგან:

1. დაკავდი რთული საქმეებით

2. აკეთე შენი საქმე

3. აკეთე ის წლების განმავლობაში

4. დაწერე შენი ისტორია.

დაკავდი რთული საქმეებით: წარმატების მისაღწევად მძიმე შრომას ალტერნატივა არ აქვს. ის წარმატებული ხალხი, რომლებიც დღეს ჩვენს აღფრთოვანებს იწვევს, სწორედ მუხლჩაუხრელი შრომით მივიდნენ იმ წერტილამდე, სადაც იმყოფებიან.

აკეთე შენი საქმე: რამდენიმე ათასი წლის წინ ბუდამ თქვა, რომ ცხოვრება არის ტანჯვა. ადვილი და უსაფრთხო გზები არ არსებობს.

ცხოვრებაში რა არჩევანიც არ უნდა გავაკეთოთ, მას ტანჯვა და სირთულეები ინსტრუქციასავით მოყვება თან.

შესაბამისად, თუ ტანჯვა და წვალება გარდაუვალია, მაშინ ისეთი არჩევანი მაინც გავაკეთოთ, სადაც ამ საფასურის გადახდა გვიღირს.

აკეთე წლების განმავლობაში: სპიკერის აზრით:

,,თუ გულწრფელად მოგწონს საქმე და აკეთებ მას წლების განმავლობაში, ფაქტობრივად ნულია იმის ალბათობა, რომ წარმატებას ვერ მიაღწიო’’

ამ პუნქტის მოსმენა ხალხს ყველაზე ნაკლებად სიამოვნებს.

ნაკლებად მოსწონთ იმიტომ, რომ ბევრს ერთ ღამეში სურს წარმატებული გახდეს.

მაშინ როდესაც, წარმატება წლობით მუშაობას და უაღრესად დიდი მოთმინებით აღჭურვას მოითხოვს .

ეპიქტეტეს აქვს ნათქვამი:

“How long are you going to wait before you demand the best for yourself?” (რამდენი ხანი შეგიძლია მოითმინო იქამდე, სანამ ცხოვრებისგან საუკეთესოს მოითხოვ?).

უკეთესად ვერ ვთარგმე ეს ციტატა, ამიტომაც ორიგინალ ვარიანტსაც ვტოვებ. 🙃 

დაწერე შენი ისტორია: ჩვენ ვართ ჩვენი ცხოვრების ავტორნი.. ჩვენ ვწერთ ჩვენი ცხოვრების წიგნს. შესაბამისად, თუ რომელიმე ფურცელი არ მოგვწონს, შეგვიძლია ამოვხიოთ და მის ნაცვლად ახალი დავწეროთ.

ან საერთოდაც, მთლიანი წიგნი მოვისროლოთ და ახლის წერას შევუდგეთ.

უბრალოდ, მნიშვნლოვანია ერთი მომენტის გაცნობიერება - ყველაფერი მეტწილად ჩვენზეა დამოკიდებული.

წიგნი, რომელსაც ვკითხულობ

გრეგორი დევიდ რობერტსის ,,შანტარამი’’.

მეგობარმა მაჩუქა.

მსუქანი წიგნია 900+ გვერდი. დროის უქონლობის გამო, ვერაფრით შევეჭიდებოდი ამხელა წიგნს.

თუმცა, ვენდობი რა ჩემი მეგობრის გემოვნებას, გულმა აღარ მომითმინა და დავიწყე.

ძალიან მომწონს.

ტიპი ავსტრალიის ციხეში ჩასვეს, საიდანაც გაიქცა და ყალბი პასპორტით ინდოეთში ჩავიდა. აქედან იწყება წიგნის თხრობა.

ძირითადი მიზეზი რატომაც მომწონს - ჩემთვის იდუმალ და მისტიურ ინდოეთში (ბომბეი) ხდება მოქმედება.

ისე ცოცხლად არის აღწერილი ყველაფერი, გეგონება პარალელურად ბომბეის ქუჩებში დაბოდიალობ.

მოკლედ, ჯერჯერობით ჯიგრულად მიდის.

სერიალი, რომელსაც ვუყურე

ჰოო.. აქ ცოტა პრობლემა გვაქვს.

ცოდვა გამხელილი ჯობიაო და ვიტყვი:

შემთხვევით აღმოვაჩინე, რომ ზემოთაღნიშნულ წიგნზე 2022 წელს სერიალი გადაუღიათ.

7.4 IMDB-ის რეიტინგი.

ცოტა ხანი ვეჭიდავე თავს. ძალიან არ მინდოდა დამეწყო ყურება (წიგნი ჯერ არ დამიმთავრებია).

თუმცა, გამომდინარე იქიდან, რომ ვირუსი შემხვდა და 4 დღე სახლში გამოვიკეტე, სხვა გზა აღარ დამრჩა.

ავდექი და 2 დღეში ვუყურე პირველ სეზონს.

თუმცა, კარგი ამბავი მაქვს. სერიალი კი მომეწონა, უამრავი ,,სპოლერიც’’ მივიღე, მაგრამ 1%-ითაც არ დამკარგვია წიგნის გაგრძელების მოტივაცია.

აღმოჩნდა, რომ სერიალი და წიგნი ნამეტანი დაშორებულია ერთმანეთისგან.

თუმცა, სერიალი ერთხელ საყურებლად ნამდვილად ღირს და ვისაც შემოგაკლდათ საინტერესო სერიალები, განიხილეთ ეს ვარიანტი.

ფრაზა, რომელიც დაგაფიქრებს

,,დამოკიდებულება უფრო მნიშვნელოვანია, ვიდრე ფაქტები. რაც უნდა ფაქტის წინაშე აღმოჩნდეთ, რაც უნდა უიმედოდ იყოს საქმე, უფრო მნიშვნელოვანი მაინც თქვენი დამოკიდებულებაა ამ ფაქტის მიმართ. მომხდარზე ფიქრმა შესაძლოა, მანამდე დაგცეთ, ვიდრე მის წინააღმდეგ რაიმე ზომას მიმართავდეთ. თუ ნებას მისცემთ, ნებისმიერი გასაჭირი დაგჯაბნით, სანამ მის აღმოსაფხვრელად რაიმეს მოიმოქმედებდეთ.’’ - ნორმან პილი

___________________________________________________________________________________

დღეისათვის სულ ეს იყო.

ერთი თხოვნა მაქვს:

იმისათვის, რომ გავიგო მოგწონს თუ არა ჩემი მეილები მჭირდება შენი უკუკავშირი.

უკუკავშირი მეხმარება იმაში, რომ შემდეგი მეილები გავაუმჯობესო და შენს რჩევა/რეკომედაციებს მოვარგო.

ამიტომაც, გთხოვ, პასუხი დამიბრუნე ამ მეილზე ძალიან მარტივი ფორმით:

მომწერე ,,5’’ - რაც ნიშნავს, რომ მოგეწონა

მომწერე ,,3’’ - რაც ნიშნავს, რომ ნორმალური იყო

მომწერე ,,1’’ - რაც ნიშნავს, რომ არ ვარგოდა.

თუ უფრო განავრცობ მაგას რა ჯობია.

თუ არადა, მოკლე მონაწერიც მეყოფა. 😅 

დიდი მადლობა!