დღევანდელ გამოცემაში ნახავ:

• 5 გზა ნეგატიურ ფიქრებთან გამკლავების

• ფრაზა დაგროვებული წყენის შესახებ

• 4 სახის სიმდიდრე

პირველად მოხვდი აქ? გამოიწერე გამოცემა.

სანამ საქმეს შევუდგებით, მანამდე პატარა თხოვნა მაქვს.

ყოველკვირეულად რამდენიმე საათს ვუთმობ გამოცემის შექმნას.

ძალიან დამეხმარებოდი, თუკი ,,კვირის ჩანაწერებს’’ 1 ადამიანს მაინც გაუზიარებ, რომელზეც ფიქრობ, რომ მოეწონება ამ ყველაფრის წაკითხვა.

ეს არის ლინკი, რომელიც შეგიძლია გაუზიარო მეგობარს:

https://tsereteli.beehiiv.com/subscribe

ნეგატიურ ფიქრებთან გამკლავების 5 გზა

პერიოდულად ყველა ვებრძვით იმ პატარა შინაგან ხმას, რომელიც გონებაში ეჭვებსა და შიშებს გვინერგავს.

ეს შინაგანი ხმა პირდაპირ საბოტაჟს გვიწყობს ხოლმე და მუხლჩაუხრელად მუშაობს ჩვენი თავდაჯერებულობის შესარყევად.

შედეგად, ვხდებით უფრო შებოჭილები. იმ ენერგიითა და ძლევამოსილებით ვეღარ ვმოქმედებთ, როგორიც ცხოვრებას ჭირდება.

ჩემს მაგალითს გაგიზიარებ:

,,კვირის ჩანაწერების’’ თითოეული გამოცემის შექმნისას, ყოველთვის ვფიქრობ, რომ არ არის საკმარისად კარგი. ვის რაში აინტერესებს? ვინ წაიკითხავს? დაგზავნის ღილაკზე დაჭერის მომენტშიც კი არ მტოვებს ეს ფიქრი.

ამ ფიქრს თუ გავყვები, ეს ინტერნეტ გამოცემა საერთოდ უნდა გავაუქმო და უარი უნდა ვთქვა ჩემს მთავარ მიზანზე: შევქმნა განვითარებაზე და ზრდაზე ორიენტირებული ხალხის ყველაზე დიდი ქართული ონლაინ გაერთიანება.

დარწმუნებული ვარ, ყველა ადამიანს თავისი მეთოდი აქვს ნეგატივთან გამკლავების.

მე ჩემს ,,იარაღებს’’ გიზიარებ, რომლებიც წლების განმავლობაში გამომიცდია და დღემდე ვიყენებ.

1. შენი ფიქრი სამსჯავროზე გამოიტანე

როდესაც ნეგატიური ფიქრი გაგირბენს გონებაში, დაფიქრდი, არის კი ეს რეალურად სიმართლე?

ჩემს მაგალითს დავუბრუნდეთ:

,,საშინლად ვწერ. არ გამომდის ეს საქმე. უნდა შევეშვა’’.

გონება მაშინვე იწყებს მტკიცებულებების მოძიებას და ყველა იმ ცუდ გამოცემას გამახსენებს, რომელიც შემიქნია.

არადა, კარგი გამოცემის უამრავი მაგალითი მაქვს არქივში. თუმცა, რატომღაც ეს მაგალითები გონებას ,,ავიწყდება’’.

2. შენი ფიქრი გარდაქმენი

ნეგატიური ფიქრი: ,,ეს საქმე ძალიან რთულია. არ მეყოფა გამოცდილება და კვალიფიკაცია. ვერ შევძლებ. ჩემზე უკეთესი კანდიდატებიც არიან’’.

გარდაქმნის შემდეგ: ,,ნამდვილად რთული საქმეა და ზუსტად ის არის, რაც მე მჭირდება. სირთულეს შევეჭიდები, პროცესში ნაბიჯ-ნაბიჯ ბევრ რამეს ვისწავლი და პროფესიულადაც გავიზრდები. თუ სადმე გავიჭედე, კვალიფიციური ხალხს დახმარებას ვთხოვ’’.

3. შენი ფიქრი ფურცელზე დაიტანე

ბევრი წარმატებული ადამიანი ამბობს, რომ წერის დაწყებას (ე.წ. Journaling) მათთვის ტრანსფორმაციული ეფექტი ჰქონდა.

ვაღიარებ, დიდად არ მჯეროდა ამ ფენომენის. არასერიოზული მეგონა.

აღმოჩნდა, რომ ვცდებოდი. ფურცელზე აზრების გადატანა მართლაც ტრანსფორმაციულია. ამ საკითხზე ვიდეოს გაკეთებას ვაპირებ.

4. სიმძიმეებით ვარჯიში

ვარჯიში (განსაკუთრებით ძალისმიერი) გონებაში ჩასახლებული ,,ჭინკის’’ გალიაში გამოკეტვის შესანიშნავი საშუალებაა. ვიმეორებ - შესანიშნავი!

5.  წაიკითხე წიგნი ეკჰარტ ტოლეს ,,აწმყოს ძალა’’

თავის დროზე ეს წიგნი ძალიან დამეხმარა. წიგნის მოკლე განხილვა შეგიძლია აქ ნახო.

ასევე, ეკჰარტის მოკლე ვიდეო ინგლისურ ენაზე.

ფრაზა დაგროვებული წყენის შესახებ

,,წყენა არის განუცდელი ბრაზის გამომხატველი სიმპტომი. ბრაზის, რომელიც სხვების მიმართ გაქვთ იმის გამო, რომ გაწუხებდნენ თავიანთი მოთხოვნებით, და ბრაზის, რომელიც საკუთარი თავის მიმართ გაქვთ იმის გამო, რომ სხვებს უარს ვერ ეუბნებოდით და საკუთარ თავზე იღებდით მთელ რიგ ვალდებულებას.’’

ემა ტურელი

4 სახის სიმდიდრე

4 სახის სიმდიდრე არსებობსო გვეუბნებიან:

1. ფინანსური (ფული)

2. სოციალური (სტატუსი)

3. დროითი (თავისუფლება)

4. ფიზიკური (ჯანმრთელობა)

უფრთხილდი ისეთ სამსახურს, რომელიც გაძლევს პირველს და მეორეს, ხოლო მესამეს და მეოთხეს გართმევს.

 ამ კვირისთვის სულ ეს იყო. აბა დროებით!

საუკეთესო სურვილებით,

ომარ ნოე წერეთელი

P.S. წინა გამოცემა თუ გამოგრჩა, შეგიძლია აქ ნახო

P.S.2. ჩემი YOUTUBE არხისთვის განათება შევიძინე. ამაზონიდან გამოვწერე და რამდენიმე დღეში მექნება. შესაბამისად, ვიდეოების ხარისხიც გაუმჯობესდება. 💪