📚 ,,მიზნები'' ბრაიან თრეისი (განხილვა)

გამარჯობა! ❤️‍🔥 

დღევანდელი მეილში ნახავ:

• წიგნის განხილვა - ბრაიან თრეისის ,,მიზნები’’.

• ფრაზა, რომელიც დაგაფიქრებს.

დამიჯერე, გამოსადეგი ინფორმაცია გელოდება წინ.

ასე რომ, ჩაუჯექი!

შესავალი

როდესაც წიგნებს განვიხილავ, ყოველთვის ვცდილობ თავდაპირველად ავტორის შესახებ მოგაწოდოთ მცირედი ბიოგრაფიული ინფორმაცია.

ახლა ამის გაკეთებას არ ვაპირებ, რადგანაც აქ უკვე ვისაუბრე თუ ვინ არის ბრაიან თრეისი და მისი სხვა ბესტლესერიც (,,აკოცე ბაყაყს’’!) მიმოვიხილე.

თუმცა, თქვენთვის არ მომიყოლია თუ ვინ იყო ბრაიან თრეისი სანამ თავბრუდამხვევ წარმატებას მიაღწევდა.

ის იყო არაფრით გამორჩეული, შეჭირვებული და პრობლემებით სავსე ადამიანი.

სკოლა ბოლო წელს მიატოვა.

მუშაობა დაიწყო სასტუმროში ჭურჭლის მრეცხავად.

შემდგომ მანქანების რეცხვაზე გადავიდა, ბოლოს იატაკებს ხეხავდა.

მუშაობდა მშენებლობაზეც, გემზე რიგითი მეზღვაურიც ყოფილა, უსახლკარობის გამო ხშირად მანქანაშიც ეძინა, ფერმაშიც უმუშავია, თივის ზვინზეც ბევრჯერ გაუთევია ღამე.

რატომ მოგიყევით ბრაიან თრეისის ბიოგრაფიის ეს ნაწილი?

რაში უნდა გვაინტერესებდეს მშენებლობაზე მუშაობდა თუ მანქანაში ეძინა?

გეტყვი.

როდესაც წარმატებისა და ცხოვრებაში სწრაფად წინსვლის შესახებ წიგნებს ვკითხულობთ, მნიშვნელოვანია ავტორის ე.წ. ,,ბექგრაუნდი’’.

თუ ისეთი ტიპი მელაპარაკება წარმატების მიღწევაზე, რომელსაც ,,გენეტიკური ჯეკპოტი’’ დაეცა თავზე და ფუფუნებაში იზრდებოდა, აი აქ ოდნავ შეიძლება ეჭვი შემეპაროს და ვიფიქრო:

,,ეე ძმაო, შენთვის იოლი სათქმელია ყველაფერი. აბა მქონდეს მეც მშობლებისგან ნაჩუქარი 100 მილიონი ანგარიშზე და წიგნსაც დავწერდი წარმატებაზე და ოცტომეულსაც’’.

თუმცა, როდესაც ავტორს აქვს არაფრით გამორჩეული წარსული და მისი ცხოვრება არაფრით განსხვავდება უბრალო ადამიანის ცხოვრებისგან, აი აქ ორმაგად საინტერესო ხდება:

რა გააკეთა ამ კაცმა ისეთი, რომ ცხოვრებას/სისტემას აჯობა და თამაშში გაიმარჯვა?

ზემოთდასმულ კითხვას ავტორი ამგვარად პასუხობს:

,,ერთ ღამეს, როდესაც სამზარეულოს მაგიდასთან ვიჯექი, გონება გამინათდა. ამან ჩემი ცხოვრება შეცვალა. უეცრად მივხვდი, რომ ყველაფერი, რაც კი მომავალში ჩემს ცხოვრებაში მოხდებოდა, ჩემზე იყო დამოკიდებული. არავინ დამეხმარებოდა. არავინ მოვიდოდა ჩემს გადასარჩენად’’.

სხვა სიტყვებით რომ ვთქვათ, ავტორმა გადაწყვიტა თავის ცხოვრებაზე აეღო სრული პასუხისმგებლობა:

გაიაზრა მარტივი ჭეშმარიტება - თუ გინდა უკეთეს სიტუაციაში აღმოჩნდე, პირველ რიგში შენი თავი უნდა გახადო უკეთესი.

ხოლო თუ შენი თავი გინდა გახადო უკეთესი, ეს სრულად შენზეა დამოკიდებული.

მაინც რას ნიშნავს უკეთეს სიტუაციაში აღმოჩენა?

კარგად იცი რასაც ნიშნავს.

შენი ,,უკეთესი სიტუაცია’’ შენზე კარგად არავინ იცის.

• შეიძლება შემოსავლის გაზრდა გინდა.

• შეიძლება დუპლექსის ყიდვა გინდა 360 გრადუსიანი აივნით.

• შეიძლება 2023 წლის Lexus RX 500H F SPORT -ის გამოყვანა გინდა ცენტრიდან.

• შეიძლება ფორმაში ჩადგომა და კუნთოვანი მასის მომატება გინდა.

• შეიძლება უკეთესი სამსახური გინდა, სადაც პატივს გცემენ და შრომას გიფასებენ.

• ან იქნებ პრესტიჟულ უნივერსიტეტში მოხვედრა?

• ან იქნებ ყველაფერი ერთად? რა პრობლემაა?

ამ ყველაფერს აქვს ერთი კარგი სახელი:

,,მიზნები’’.

ზუსტად აქ ერთვება ეს წიგნი. ყველანაირ მიზანს შეგასრულებინებო გვეუბნება...

თუ როგორ აკეთებს ამას, მოდით ახლოდან ვნახოთ.

წიგნის სტრუქტურა

Goodreads-ის რეიტინგი - 4.24/5.

წიგნის პირველი 60 გვერდი ,,აკოცე ბაყაყიდან!’’ არის გადმოტანილი.

ვაპატიოთ ეს ავტორს.

სჭირდებოდა ალბათ ,,შესახურებლად’’.

60 გვერდის შემდგომ იწყება მთავარი თემა:

ნებისმიერი მიზნის დასახვისა და მიღწევის 12 ნაბიჯი.

უაღრესად საინტერესო ტექნიკაა.

ძალიან ლოგიკურად და თანმიმდევრულად გაწერილი.

ამ 12 ნაბიჯის გაანალიზების შემდგომ, ჩათვალე დეტალური რუკა გაქვს მზად, რომელსაც თუ მიყვებით შენს მიზნამდე მიხვალ.

თორმეტივე კითხვა ფურცელზე უნდა გადაიტანო და წერილობით გასცე პასუხი.

ყველა ნაბიჯი უეჭველად უნდა დაწერო ფურცელზე.

გონებაში დალაგებას აზრი არ აქვს. არც კომპიუტერში ჩამოყარო.

ფურცელი და კალამი დაგჭირდება. ამას თავისი ახსნა აქვს. აქ არ მოგიყვები.

ძალიან მოკლედ ჩამოვყაროთ თორმეტივე ნაბიჯი:

1. სინამდვილეში რა გინდა?

2. ირწმუნე, მიზნის მიღწევა შესაძლებელია.

3. დაწერე მიზანი ფურცელზე.

4. განსაზღვრე ამოსავალი წერტილი.

5. განსაზღვრე რატომ გინდა ამის მიღწევა.

6. დააწესე საბოლოო ზღვრული ვადები.

7. განსაზღვრე, გზად რა წინაღობები შეგხვდება.

8. განსაზღვრე, რა დამატებითი უნარ-ჩვევები და ცოდნა გჭირდება.

9. შეარჩიე ის ადამიანები, ვისი დახმარებაც დაგჭირდება.

10. ყველასფერს ერთად მოუყარე თავი.

11. მუდმივად ნათლად წარმოიდგინე შენი მიზანი.

12. არასოდეს დანებდე.

ავტორი ძალიან დეტალურად, დამაჯერებლად და გასაგებად გადმოსცემს თუ რა სიღრმეები იმალება ამ 12 ნაბიჯის უკან.

ასევე, დეტალურად საუბრობს როგორ გავცეთ ამ შეკითხვებს სწორად პასუხი.

ცალკე თავი აქვს დათმობილი ფინანსური მიზნების, ჯანმრთელობის, ფორმაში ჩადგომის, პირადი ურთიერთობების მოწესრიგების ტექნიკებს.

გვაქვს ერთი პრობლემა.

წიგნს უკანა ყდაზე აწერია შემდეგი სიტყვები:

,,...ბრაიან თრეისი მარტივად და ნაბიჯ-ნაბიჯ, არგუმენტირებულად და ორიგინალურად აგიხსნით, როგორ მიაღწიოთ სასურველს, ე.ი. მიზნების მიღწევაში დაგეხმარებათ და აგარიდებთ ხანგრძლივ და მძიმე შრომას’’.

ორივე ხელით ვეთანხმები ამ სიტყვების პირველ ნაწილს.

რაც შეეხება ბოლო წინადადებას - ,,აგარიდებთ ხანგრძლივ და მძიმე შრომას’’.

ეს არ მგონია მართალი.

გეტყვი რატომაც:

მივუბრუნდეთ 12 ნაბიჯს.

იდეალური ტექნიკაა.

თუმცა, ვერანაირად ვერ აგვარიდებს ,,ხანგრძლივ და მძიმე შრომას’’.

შრომას ვერაფერი აგვარიდებს. არ არსებობს მოკლე გზა.

აბა მიდი სცადე შეარჩიო 1 მთავარი მიზანი.

მერე გამონახო თავისუფალი დრო და მაგიდას მიუჯდე.

დაიწყო წერა და 12 ნაბიჯის მიხედვით ყველაფერი გემრიელად გაწერო.

სანაძლეოს დაგიდებ მაგრად გაგიჭირდება.

1 კვირა დამჭირდა გემრიელად რომ გამეწერა ჩემი მთავარი მიზანი.

პროცესში აღმოაჩენ, რომ არაფერი იცი შენი მიზნების შესახებ.

აღმოაჩენ, რომ წერა გიჭირს.

აღმოაჩენ, რომ ,,შემოსავლის გაზრდა’’ კი გინდა, მაგრამ ამ თემაზე სიღრმისეულად არასდროს გიფიქრია.

აღმოაჩენ, რომ წარმოდგენა არ გაქვს რას გულისხმობ ,,შემოსავლის გაზრდაში’’.

ვთქვათ, წელიწადში გამოიმუშავებ 40 000 ლარს. 

და რა გინდა მერე?

რა საზომი გაქვს შემოსავლის გაზრდის?

1 წლიან პერსპექტივაში რამდენით გინდა გაგეზარდოს?

5 ლარით? 5000 ლარით? თუ 50 000 ლარით?

აღმოაჩენ, რომ ,,შემოსავლის გაზრდა’’ კი გინდა, მაგრამ არ გიფიქრია ხელისშემშლელ წინაღობებზე.

წერას რომ დაიწყებ, მერე მიხვდები, რომ თურმე ის ინგლისურის სერთიფიკატი გჭირდება შენს მიზანს რომ მიაღწიო.

მერე მიხვდები, რომ თურმე ვიდეო თამაშებს იმდენი დრო აღარ უნდა დაუთმო.

მერე მიხვდები, რომ თურმე ლექსიკური მარაგი გაკლია.

არადა, გჭირდება სამსახურში დამაჯერებლად საუბარი.

 შესაბამისად, უფრო მეტი მხატვრული წიგნები გაქვს წასაკითხი.

მოკლედ, ხომ გამიგე რისი თქმაც მინდა.

ამიტომაც, ეს პროცესი მარტივი სულაც არ მგონია.

თუმცა!

საკმარისია გულიანად ჩაუჯდე 12-ივე პუნქტს, მაშინვე მიხვდები, რომ სწორ გზაზე დადექი.

მაშინვე მიხვდები, რომ შენს მიზნებს სახეს გააძრობ.

საბოლოოდ.

მაქსიმალურად შევეცადე წიგნის მთავარი სათქმელი მომეტანა შენამე.

იმედია გამომივიდა.

გულწრფელად ვიტყვი, მინიმუმ 3-ჯერ ამაზე დიდი ტექსტი მქონდა გამზადებული.

მერე ვიფიქრე, რას ვერჩი ამ ხალხს?

მაქსიმალურად შევამოკლე ისე, რომ ძირითადი სათქმელი არ დაკარგულიყო.

ნებისმიერ შემთხვევაში, გირჩევთ თავად წაიკითხო წიგნი.

ფრაზა, რომელიც დაგაფიქრებს.

ჯერ კიდევ 2000 წლის წინ მარკუს ავრელიუსი წერდა:

,,ჭეშმარიტად შლეგია ის, ვინც ნიადაგ ფუსფუსებს, იღწვის, რუდუნებით ქანცგაწყვეტილი, მაგრამ მაინც არ გააჩნია გარკვეული მიზანი, რომლისკენაც მიმართავდა ყველა სწრაფვას, ყველა გულისთქმას’’

სულ ეს იყო.

იმედი მაქვს, მოგეწონა დღევანდელი მეილი. 👌 

P.S. ცნობისთვის, წიგნი აქ შევიძინე;

P.S.2. მიზნების დასახვის ტექნიკების შესახებ უაღრესად საინტერესო მასალას ვამზადებ. კონკრეტული მაგალითებით, სავარჯიშოებით, პრაქტიკული ცოდნით იქნება გაჯერებული.

შესაბამისად, ყურადღება მიაქციე ჩემგან მოსულ მეილებს.

რამე საინტერესო არ გამოგრჩეს.