N7 📚 15 ივლისის ნიუსლეთერი

🤩მოგესალმებით,

რას ნახავთ ამ მეილში?

• ჩემი შთაბეჭდილება წიგნზე - ,,მიჯაჭვულობის ფსიქოლოგია’’ მარინა კაჭარავა

• წიგნიდან გამომდინარე საინტერესო ვიდეო

• საინტერესო ამბავი ტომას ედისონის ბიოგრაფიიდან

• მუსიკა, რომელიც აღმოვაჩინე და მომწონს

,,მიჯაჭვულობის ფსიქოლოგია’’ მარინა კაჭარავა

ადამიანის ცხოვრების გზაზე სხვადასხვა სახის მიჯაჭვულობა (ადიქცია) გავრცელებული ფენომენია. ამაში ალბათ, გარკვეული დოზით ყველანი ვართ შემჩნეულნი. მაგრამ როდის ხდება ადიქცია საშიში? ან რა ტიპის ადიქცია არსებობს დღევანდელ სამყაროში? რა არის მისი გამომწვევი მიზეზები? ბავშვობის ტრამვა? უსიყვარულობა? საზოგადოება? ოჯახი? ზუსტად ამ საკითხებს ეხება ეს წიგნი. წიგნში შეხვდებით შემდეგ აქტუალურ თემებს:

· ნარკოდამოკიდებულება;

· ლუდომანია;

· საუკუნის ტყუილი მარიხუანას სარგებელზე;

· LSD;

· სააფთიაქო ნარკომანია და საქართველო;

· კვებითი აშლილობები;

· ინტერნეტზე დამოკიდებულება.

უნდა აღვნიშნოთ, რომ როდესაც რაიმე სახის დამოკიდებულება ყალიბდება ამაში მხოლოდ ინდივიდი არ არის დამნაშავე და პასუხი მის გარშემომყოფებში უნდა ვეძებოთ. სწორედ აქ ენიჭება მნიშვნელობა თუ როგორ ოჯახში იზრდებოდა პიროვნება. როგორც ავტორი ამბობს, არსებობს ფუნქციური და დისფუნქციური ოჯახები. ფუნქციურ ოჯახში ყველაფერი მეტ-ნაკლებად დალაგებულია. იქ უყვართ ერთმანეთი, პატივს სცემენ ერთმანეთს. ფუნქციურ ოჯახში ვერ ნახავთ ტოქსიკურ ურთიერთობებს.

რაც შეეხება დისფუნქციურ ოჯახს - ავტორი ასახელებს დისფუნქციური ოჯახის რამდენიმე მოდელს. მაგალითად, ,,ოჯახი თეატრი’’, სადაც ერთმანეთს გამუდმებით ატყუებენ. ასევე, ავტორი საუბრობს ,,ოჯახი ციხე-სიმაგრის’’ შესახებ, სადაც თავს გარემოსგან მაქსიმალურად იცავენ და იზოლირებულნი არიან.

ავტორი განასხვავებს ოჯახებს აღზრდის სტილის მიხედვითაც და ამბობს, რომ არსებობს 3 ტიპის აღზრდის სტილი: ავტორიტარული, დემოკრატიული და დემოკრატიულ-ავტორიტარული:

ავტორიტარულ ოჯახში არსებობს აბსოლუტური მორჩილება ოჯახის უფროსის მიმართ. ჩაკლულია ყოველგვარი ინდივიდუალიზმი და ბავშვი როგორც წესი იზრდება და ხდება ან ძალიან დაჩაგრული ან ძალიან აგრესიული.

დემოკრატიულ ოჯახს რაც შეეხება, აქ სრულად მოშლილია ღირებულებათა სისტემა. ბავშვი ვერ გებულობს თუ ვის წინაშე არის ანგარიშვალდებული. მას ავიწყდება რომ უფლებებთან ერთად აქვს მთელი რიგი მოვალეობები. მსგავსი ტიპის ოჯახში ბავშვი ვერ ხვდება თუ როგორ მოიხმაროს მშობლებისგან ,,ბოძებული’’ თავისუფლება და მიმართავს დესტრუქციულ ჩვევებს.

რაც შეეხება დემოკრატიულ-ავტორიტარულ ოჯახებს, ავტორის აზრით ეს არის ის ოქროს შუალედი, რომელსაც ყველა ოჯახი უნდა ესწრაფოდეს.

ზუსტად ოჯახიდან და ბავშვობაში მიღებული ფსიქოლოგიური ტრამვების შედეგად ყალიბდება დამოკიდებულებები. წიგნი საინტერესო იყო განსაკუთრებით იმ კუთხით, რომ ის ეხება ჩვენს ქვეყანაში მკვეთრად გავრცელებულ პრობლემებს - ნარკოდამოკიდებულებას, გემბლინგს, მარიხუანას მოხმარებას და სააფთიაქო ნარკომანიას.

მე როგორც ნულოვანი ცოდნის მქონემ ამ სფეროში, ბევრი ახალი რაღაც გავიგე და უფრო ინფორმირებული გავხვდი მნიშვნელოვანი საკითხვების გარშემო... სულ რაღაც 170 გვერდია წიგნი და მთელი რიგი მნიშვნელოვანი კონცეფციები ძალიან მოკლედ და აზრიანად არის დალაგებული. რაც კითხვასაც აადვილებს.

რამდენიმე ციტატა წიგნიდან:

,,ადიქტური ქცევის ჩამოყალიბებაში ძალიან მნიშვნელოვანია, როდესაც რომელიმე მშობელი ადიქტურია. თუ მშობელი რამეზეა მიჯაჭვული, მაგალითად, სტრესულ მდგომარეობაში ალკოჰოლის მიღებაზე, ბავშვი იმახსოვრებს, რომ სტრესის დროს შეუძლია დალიოს ალკოჰოლი და გათავისუფლდება’’.

,,დამოკიდებული პიროვნება უუნაროა დაგეგმოს მომავალი, არ შეუძლია, ძირეულად შეაფასოს წარსული და ივარაუდოს, რა მოჰყვება ამა თუ იმ ქცევას მომავალში’’

,,მნიშვნელოვანია, რომ დამოკიდებულების არსებობის შემთხვევაში შეიძლება მთელი საზოგადოება იყოს დამნაშავე. მაგალითად, ოჯახურ ფსიქოთერაპიაში ითვლება, რომ თუ ერთი წევრი ნარკომომხმარებელია, ნიშნავს რომ მთელი ოჯახი დაავადებულია. უბრალოდ, გამოდის, რომ თითქოს მხოლოდ იმ ერთმა აიღო დარტყმა თავის თავზე და იდენტიფიცირებულ პაციენტად იქცა. ყველას ჰგონია, რომ მასშია პრობლემა. სინამდვილეში მთელი ოჯახია საშველი. ამიტომ უნდა გაცნობიერდეს მიზეზი, რატომ და როგორ აღმოჩნდა ეს პიროვნება ნარკოდამოკიდებული’’.

საინტერესო ვიდეოს წიგნიდან გამომდინარე:

აღნიშნულ ვიდეოში მარინა კაჭარავა საუბრობს ,,მძიმე’’ და ,,მსუბუქი’’ ნარკოტიკზე დამოკიდებულებაზე.

ამბავი ტომას ედისონის ბიოგრაფიიდან

დაახლოებით 1093 ცდის წყალობით ტომას ედისონი ისტორიაში ერთერთი თვალსაჩინო მაგალითია იმისა, რომ ნებისმიერი წარმატების წინაპირობა მარცხია. თუმცა, ედისონის ბიოგრაფია მხოლოდ ამ კუთხით არ არის გამორჩეული. ტომას ედისონს ჰყავდა ძალიან კარგი მენტორი დედის სახით. ედისონს სკოლაში არ უვლია, დედა ამეცადინებდა სახლში. ძირითადად კლასიკურ ლიტერატურას და ისტორიას უკითხავდა

,,საოცრად ზრდიდა დედამისი’’ - იხსენებს Matthew Josephson ტომას ედისონის ბიოგრაფიაში - ,,9 წლის ასაკში უკვე საოცარ წიგნებს კითხულობდა... რამაც კითხვა ძალიან შეაყვარა’’. Josephson ასევე წერს - ,,დედამისმა შეძლო ის, რასაც მხოლოდ ნამდვილი მასწავლებლები ახერხებენ - მან ედისონში ცოდნის შიმშილი გააჩინა და რაც მთავარია, სწავლა სასიამოვნო აქტივობად უქცია’’

12 წლის ასაკში ედისონმა მუშაობა დაიწყო მატარებელში გაზეთების დამტარებლად. ხშირად დადიოდა საჯარო ბიბლიოთეკაში. ,,ჩემი თავშესაფარი დეტროიტის საჯარო ბიბლიოთეკა იყო’’ - ამბობს ედისონი. ,,კითხვა დავიწყე თაროზე არსებული პირველი წიგნიდან და რიგრიგობით მივყევი. საბოლოოდ წავიკითხე არა ბევრი, არამედ ძალიან ბევრი წიგნი’’

მთავარი გაკვეთილი - ჩემი აზრით, წიგნების კითხვის ერთერთი უმნიშვნელოვანესი დადებითი მხარე არის ჩვენს ტვინში კრეატივის და შემოქმედებითობის გაღვიძება. ტომას ედისონის მაგალითზე ეს კარგად ჩანს. მისი ბიოგრაფიც იმავეს ადასტურებს. როგორც Josephson წერს, ლიტერატურა უნდა ყოფილიყო ედისონის გამომგონებლობის ნიჭის პირველსაწყისი

მუსიკა, რომელიც აღმოვაჩინე და მომწონს

Patti Smith - Changing of the Guards - Youtube ლინკი

დღეისთვის სულ ეს იყო. აბა შეხვედრამდე :)