N8 📚 19 ივლისის ნიუსლეთერი

მოგესალმებით ყველას,

დღევანდელი ნიუსლეთერის თემატიკა არის ლიტერატურა და წიგნების კითხვა. წინა კვირაში ფეისბუქზე დავდე პოსტი, სადაც გავაზიარე 9 პრაქტიკული რჩევა თუ როგორ ვიკითხოთ უფრო მეტი წიგნი. პოსტმა დიდი გამოხმაურება მოაგროვა. ამიტომაც, გადავწყვიტე ეს თემა უფრო განმევრცო (მხოლოდ ნიუსლეთერის აუდიტორიისთის 🙂 ). მაშ ასე:

როგორ ვიკითხოთ უფრო მეტი? 9 პრაქტიკული რჩევა

1. არ არის სავალდებულო დაწყებული წიგნი ბოლომდე მიიყვანო. ადრე წიგნს თუ დავიწყებდი, ჩვევად მქონდა მისი ბოლომდე გაყვანა. არადა მარტივ ჭეშმარიტებას ვიტყვი: როდესაც წიგნის კითხვას დაიწყებ თუ შეატყობ, რომ არ მოგწონს, შეეშვი და თაროზე დააბრუნე. არ ტეხავს! 

ეს რჩევა განსაკუთრებით მათ გამოადგებათ ვინც ჯერ არ არის აქტიური მკითხველი. წარმოიდგინე კითხვის ჩვევის დანერგავს როცა ცდილობ და რაღაც საძაგელი წიგნი შეგხვდა, რომელიც მაგრად არ გაინტერესებს. თუ შენ თავზე იძალადებ და მის წაკითხვას მაინც შეეცდები, შეიძლება კითხვის პროცესი საერთოდ შეგძულდეს. ასე რომ, მოისროლე ის წიგნები, რომლებიც არ მოგწონს მანამ სანამ შენს მოსაწონ წიგნს არ იპოვი.

2. იკითხე შენი რეალური ინტერესების შესაბამისად. არ არის აუცილებელი ის წიგნი იკითხო, რომელსაც ყველა კითხულობს. არ არის აუცილებელი რაღაც გამოგონილ სიებს და რეიტინგებს მიყვე. დაიმახსოვრე, არ არსებობს სავალდებულოდ საკითხავი წიგნები.

არავითარი 50 წიგნი, რომელიც უნდა წაიკითხო სანამ ცოცხალი ხარ (ამ პროექტს არაფერს ვერჩი, პირიქით). რაც გაინტერესებს იმას მიყევი - გაინტერესებს წიგნები გემების შესახებ? იკითხე წიგნები გემების შესახებ. გაინტერესებს წიგნები პატარა ზღარბების ანატომიის შესახებ? 😁 იკითხე წიგნები პატარა ზღარბების ანატომიის შესახებ.

ადრე მახასიათებდა ისეთი წიგნების კითხვა, რომლებიც გარკვეული კატეგორიის ,,სასტავში’’ ჩამწერდა. ჩემს მეგობრებში ერთ დროს პოპულარული იყო ამერიკული კომიქსების კითხვა. მეც გადავწყვიტე, რომ კომიქსები მაგრად მევასებოდა და ვკითხულობდი და ვკითხულობდი. არადა, საერთოდ ვერ ვამუღამებდი და უბრალოდ თავს ვიკატუნებდი თითქოს მომწონდა. სინამდვილეში მაგრად არ მაინტერესებდა.

ასე რომ, არ გაიმეორე ჩემი შეცდომა. და საერთოდაც, ინდივიდუალიზმის შენარჩუნება ყველგან მნიშვნელოვანია. დაუჯერე ჩემს ჭაღარას (არ მაქვს მაგრამ მაინც 😃 ).

3. წიგნი გქონდეს ყოველთვის ადვილად ხელმისაწვდომ ადგილას. საწოლის თავთან იქნება ეს, ჩანთაში თუ სამუშაო მაგიდაზე. მე რას ვაკეთებ - რამდენიმე წიგნი სამსახურში მაქვს ხოლმე, ჩანთაში ერთი უეჭველად მიგდია, სახლში ხო თავისთავად (ეხლა ვფიქრობ მანქანაშიც ჩავაგდო ერთი).

ეს მეხმარება იმაში, რომ მიადვილდება წიგნის გადაშლა და კითხვის პროცესის დაწყება. სხვა სიტყვებით რომ გითხრა, ჩემს გარშემო არსებულ გარემოს ვაწყობ ჩემი გამარჯვების შესაბამისად, როგორც ჯეიმს ქლიერი იტყოდა.

ეს კონცეფცია არის საკმაოდ მნიშვნელოვანი. წარმოიდგინე, რომ ყოველ დილით წამალი გაქვს დასალევი, მაგრამ სულ გავიწყდება. რა უნდა ქნა? ადექი და ეს წამალი დადე შენი ყავის ჭიქის გვერდით. შესაბამისად, დილას რომ ადგები და ყავის დასალევად გაიწევ, წამალიც იქვე ,,შეგეფეთება’’ და თავს გაგახსენებს. ზუსტად იგივე მუღამი დგას წიგნების ხელმისაწვდომ ადგილას განთავსების იდეაში.

4. თუ კითხვის დაწყებას აპირებ და ფეისბუქის ჩატის ჯგუფიდან შეტყობინებების წვიმა მოდის, ბუნებრივია ყურადღება გაგეფანტება. ან დაიწყე კითხვა, ტელევიზორი გაქვს ჩართული და ნეტფლიქსზე შენი საყვარელი სერიალის ,,Friends’’-ის სერია გადის. ეხლა მითხარი ამ საქმიდან რა უნდა გამოვიდეს? ხო შანსი არაა კითხვა მოახერხო?

უნდა მოახდინო ყურადღების გამფანტველი საგნების ლიკვიდაცია! ზოგადად, მაგრად არ მჯერა მულტიტასკინგის. მგონია, რომ თუ ბევრ საქმეს აკეთებ ერთდროულად, საბოლოო ჯამში ნიშნავს, რომ არაფერს აკეთებ. ჩემი ეს რწმენა გაამყარა დღეს მიღებულმა ინფორმაციამ - ეხლა ვკითხულობ უსაყვარლეს წიგნს ,,იკიგაი“. წიგნის ერთერთი თავი სწორედ მულტიტასკინგს ეხება. აი რას წერს ავტორი:

,,სხვა მრავალი კვლევა აჩვენებს, რომ ბევრი დავალებების პარალელურად შესრულება ამცირებს ჩვენს პროდუქტიულობას მინიმუმ 60%-ით და IQ-ს 10 ერთეულით’’.

ასე რომ, კითხვისას მნიშვნელოვანია მაქსიმალური კონცენტრაცია.

5. დაისახე ყოველდღიური მიზანი თუ მინიმუმ რამდენ გვერდს წაიკითხავ. ეს აკეთებს ორ რამეს:

1. როცა მიზანს მიაღწევ, კარგი გრძნობაა To Do List-ში ერთი გადახაზული აქტივობა რომ გაქვს;
2. კითხვას როცა დაიწყებ, დიდი ალბათობით შეყვები, ჩაგითრევს და დასახულ მინიმუმსაც გადააჭარბებ.

ჩემი მინიმალური მიზანი არის დღეში 20 გვერდის წაკითხვა. დღეში 20 გვერდი ხო არაფერი არ არის (15 წუთის ამბავია), მაგრამ ეს მეხმარება იმაში, რომ კითხვა ვაქციო ყოველდღიურობად.

ვსვამ შეკითხვას - დღეში 20 გვერდის წაკითხვა ჯობია თუ საერთოდ არ წაკითხვა? მგონი პასუხი ნათელია. ამიტომაც, დაიწყეთ მინიმუმით. და საერთოდაც ჩემო ძმაო/დაო, ნუ ეხუმრები დღეში 20 გვერდის კითხვას. ეგ ციფრი არის წელიწადში 7 500-მდე გვერდი, რაც არის დაახლოებით 20 წაკითხული წიგნი. 🤪 

6. უსმინე აუდიო წიგნებს. ვისაც კითხვის პროცესი არ უყვარს აუდიო წიგნები იდეალური ვარიანტია. აუდიო წიგნებს შეგიძლია უსმინო ყველგან - საცობში, სამსახურისკენ მიმავალ გზაზე, სახლის დალაგების დროს.

აუდიო წიგნებს ვიყენებდი ძალიან, ძალიან აქტიურად. ეხლა იმდენად აღარ ვუსმენ (პოდკასტებზე გადავერთე). ენით ვერ აღვწერ როგორ მომწონს აუდიო წიგნები და რამხელა სარგებელი მოაქვს. გეტყვი ჩემს გამოცდილებას:

სახლიდან სამსახურამდე მჭირდება 40 წუთი. ეს არის დღეში 80 წუთი. ანუ ყოველდღიურად მაქვს 80 წუთი, რომელსაც ვფლანგავ. და რა მოხდება თუ ამ 80 წუთს პროდუქტიულად გამოვიყენებ? ზუსტად აქ დამეხმარა აუდიო წიგნები. დღეში 80 წუთი წიგნს რომ უსმინო ძალიან მაგარ რაღაცებს გაიგებ და მაგრად წაგადგება ცხოვრებაში.

უბრალოდ აქ გეტყვი ერთ Pro რჩევას. 😉 კაი შერჩევა ჭირდება თუ რა წიგნს მოუსმენ. რაღაც მძიმედ საკითხავი, ტვინის ბურღი წიგნები რომ არის მაგათ მოსმენას არ გირჩევ. დაგტანჯავს. აუდიო წიგნებად მოუსმინე მსუბუქ ლიტერატურას. მაგალითად, თუ დაიწყებ ფოლკნერის ,,აგვისტოს ნათელის’’  მოსმენას, აი ვერ მოუსმენ რა. დაიბრიდები. მაგრამ ძალიან გაგართობს მაგალითად ჰარუკი მურაკამის რომელიმე წიგნი, ან პერსონალური განვითარების ლიტერატურიდან რამე მსუბუქი საკითხავი.

ასევე, ბევრი მეკითხება, სად ვუსმენ აუდიო წიგნებს. ქართულად არ ვიცი. იუთუბზე მგონი დევს რაღაც პირატული ვერსიები. აი ინგლისურად კიდე ვიყენებ Audible-ს. თვეში ვიხდიდი 15 დოლარს და ეგ პაკეტი ყელამდე მყოფნიდა.

7. თუ უცხო ენაზე კითხულობ განიხილე ამაზონ კინდლის ყიდვის საკითხი. კინდლში შენ გექნება ათიათასობით წიგნი ხელმისაწვდომი ნებისმიერ დროს.

უცხო ენა იმიტომ ვახსენე, რომ კინდლი კითხულობს სპეციალური ფორმატის წიგნებს (MOB ფორმატი). ამ ფორმატში ქართულ ენაზე წიგნები ნაკლებად გვაქვს. შესაბამისად, მხოლოდ ქართულად თუ კითხულობ კინდლი შენთვის არაეფექტურია.

პირველი კინდლი შევიძინე მახსოვს 2009 თუ 2010 წელს. მას შემდგომ უფრო დაიხვეწა და განვითარდა. ამაზონიდან შეგიძლია გამოწერო და ფასდაკლებებზე სადღაც 60 დოლარამდე ჩამოდის ხოლმე ფასი. ხოლო შემდგომ, უცხო ენაზე პირატულ წიგნებს ძალიან მარტივად ნახავ.

კარგი რამეა ეს კინდლი იმ კუთხით, რომ აქვს ე.წ. მელნის ეკრანი და გამოსხივება 0. რაღა ფურცლისთვის გიყურებია, რაღა კინდლის ეკრანისთვის. არის ისეთი მოდელები, რომლებსაც შიგნით ჩაშენებული აქვს განათება, მაგრამ მაინც არ აქვთ გამოსხივება ტექნოლოგიურად ისეა გაკეთებული არ ასხივებს. ეგ პროცესიც ვიცი, უბრალოდ არ მოგიყვები, მოსაწყენია. სიტყვაზე მენდე.

8. დარეგისტრირდი სოციალურ ქსელ Goodreads-ზე. ეს არის პლტაფორმა, სადაც გაერთიანებულია ლიტერატურის მოყვარული ხალხი. გარდა იმისა, რომ ამ პლატფორმაზე გაიჩენ თანამოაზრეებს, ასევე პლატფორმის საკმაოდ ნორმალური ალგორითმის წყალობით, მიიღებ რეკომენდაციებს თუ რა წიგნი ერგება შენს გემოვნებას.

მე აღარ ვიყენებ ამ პლატფორმას. ისედაც საკმარისი რაოდენობის სოც. ქსელი მაქვს და კიდევ ერთი აღარ მინდა. მაგრამ როცა მქონდა კარგად ვიყენებდი. შეგიძლია შენი თაროები მოაწყო და ციფრულად აკონტროლე რა წიგნები გაქვს წაკითხული, მათი დახარისხება გააკეთო. შემდგომ ალგორითმი შენი წაკითხული და შეფასებული წიგნების შესაბამისად გირჩევს ახალ წიგნებს, რომლებიც შეიძლება რომ მოგეწონოს.

9. მოახდინე წიგნის ჟანრების დივერსიფიკაცია. რაღაც პერიოდი ერთი ჟანრის წიგნებს როცა კითხულობ, მობეზრება იცის და ხანდახან უნდა გადაერთო და გონება სულ სხვა მიმართულებაზე გადაიტანო. მაგალითად, თუ ყოველთვის მხატვრულ ლიტერატურას კითხულობ სცადე წაიკითხო ბიზნეს ლიტერატურა, ან ისტორიული ან ბიოგრაფიული ჟანრის. დამიჯერე, კარგად მუშაობს ეს მეთოდი.

დღეისათვის სულ ეს იყო. იმედია საინტერესო მეილი გამოვიდა.

შეხვედრამდე ;)

P.S. შეგიძლია ინსტაგრამზეც გამომყვე:
https://www.instagram.com/tsereteli_1/