გამარჯობა,

,,კვირის ჩანაწერების’’ ამ გამოცემაში ნახავ:

• კვირის აზრი (მოზღვავების მდგომარეობა)

• კვირის ვიდეო (რას ირჩევ?)

• კვირის შეკითხვა

• კვირის ფრაზა (ოლდოს ჰაქსლი)

კვირის აზრი

ფსიქოლოგები ხშირად მოგვიწოდებენ ვიპოვოთ საყვარელი საქმე. ისეთი საქმე, რომელიც შთაგონებით, ენერგიით და სიხარულით გვავსებს.

მე მჯერა, რომ ესეთი ,,საქმე’’ ყველა ადამიანისთვის არსებობს. და თუ არ გვიპოვია, ჩვენი ამოცანაა ეს ,,საქმე’’ აღმოვაჩინოთ და მივყვეთ.

საყვარელი საქმის ჩემეული განმარტებაა:

საქმე, რომელიც შეიძლება გარეშე თვალისთვის მძიმედ და რთულად გამოიყურებოდეს, მაგრამ ჩვენთვის გართობა და თამაშია.

საყვარელი საქმის კეთებას ერთი თავისებურება ახასიათებს - მასში თავით გადავეშვებით-ხოლმე. ბოლომდე ვიხარჯებით. საკუთარ თავსაც კი ვჯობნით. დრო შეიძლება ისე გავიდეს, ვერც ვგებულობთ.

ამ ფენომენს ჩიკაგოს უნივერსიტეტის პროფესორი მიჰაი ჩიკსენტმიჰაი ,,მოზღვავებას’’ უწოდებს. ანუ უზენაესი აღტკინების წუთები, როდესაც ჩვენი შესაძლებლობების პიკზე ვართ.

ამის შესახებ დენიელ გოლმენი ამბობს:

,,სპორტსმენებისთვის ცნობილია ამგვარი შთაგონების მდგომარეობა, რომელსაც ისინი ,,ზონას’’ უწოდებენ. როდესაც ბრწყინვალე შედეგს სრულიად ძალდაუტანებლად აღწევენ, ხოლო ასეთ წუთებში მოწინააღმდეგე და მაყურებელი თითქოს ქრება. დიანა როფე-შტაინროტერმა, რომელმაც 1994 წლის ზამთრის ოლიმპიადაზე ოქროს მედალი აიღო, თქვა, რომ არაფერი ახსოვდა, სრული მოდუნებულობის გარდა: ,,მეგონა, ჩანჩქერი ვიყავი.’’’’

დარწმუნებული ვარ, ყველასათვის ნაცნობი სიტუაცია აღვწერე. მეც არაერთხელ გამომიცდია მსგავსი ,,მოზღვავების’’ მდგომარეობა. ამ დროს, ყველაფერი მარტივად და ხარისხიანად გამომდის.

თუმცა, ,,მოზღვავების’’ მდგომარეობას ვერასდროს მივაღწევთ, როდესაც მოსაწყენ საქმიანობას ვეწევით. საქმეს, რომელიც ყელში გვაქვს ამოსული და შეიძლება გვეზიზღება კიდეც.

,,მოზღვავების’’ მდგომარეობა მხოლოდ იმ საყვარელ საქმიანობაში გამოიჩენს ხოლმე თავს, რომელიც ზევით აღვწერე.

რეკლამა

რა ვაჩუქო? რა მოსწონს? რა გაუხარდება? იქნებ ეს უკვე აქვს? ძალიან ხშირად გვაწუხებს ადამიანებს ეს შეკითხვები და ძალიან რთული პროცესია პერსონალიზებული საჩუქრების შერჩევა.

ეს კომპანია საჩუქრის შერჩევის პროცესს ამარტივებს.

მე ჩემს გამომწერებს უხარისხო პროდუქტს არ ვაკადრებ. თუ ამ კომპანიას ვუწევ რეკომენდაციას ეს ნიშნავს 2 რამეს: ძალიან მომწონს და პირადად გამომიცდია (არაერთხელ).

ჰოდა, სცადეთ კომპანია YOLO - განსხვავებული და დასამახსოვრებელი საჩუქრები საყვარელი ხალხისთვის.

კვირის ვიდეო

• ბევრის მთქმელია ეს 3 წუთიანი ვიდეო

• ამ ვიდეოში განვიხილავ წიგნს, რომელმაც გამაოცა

კვირის ფრაზა

წიგნში ,,საოცარი ახალი სამყარო’’ ოლდოს ჰაქსლის აქვს ერთი ესეთი ფრაზა, რომელიც პირდაპირი ფორმულაა არათუ ინდივიდის, არამედ მთლიანი საზოგადოების გასანადგურებლად:

,,არასოდეს გადადო ხვალისთვის ის, რისგანაც დღეს შეგიძლია მიიღო სიამოვნება.’’

კვირის შეკითხვა

საკუთარი თავისთვის საინტერესო კითხვების დასმა და პასუხების მიღება პიროვნული ზრდის ერთერთი მძლავრი იარაღია:

,,კიდევ 3 თვის განმავლობაში უცვლელად თუ მივყვები ცხოვრების იმ წესს, რომელსაც ამჟამად მივსდევ, ჩემთვის სასარგებლო იქნება თუ საზიანო?’’

დღეისათვის სულ ეს იყო,

აბა სასიამოვნო კვირას გისურვებ,

ომარ ნოე წერეთელი

P.S. როგორ მოგეწონა დღევანდელი მეილი?

გთხოვ, გამომეხმაურო და მომწერო ციფრი. 💙 

💌 5 - მომეწონა.

😒 3 - ისე რა.

💢 1 - არ მომეწონა.