გამარჯობა,

კვირის ჩანაწერების დღევანდელ გამოცემაში ნახავ:

• კვირის ვიდეო (ის, რაც ყველას გაგვიკეთებია და აღარ უნდა გავაკეთოთ)

• კვირის ფილმი (ძალიან მომეწონა)

• კვირის აზრი (მწარე გაკვეთილი)

• კვირის შეკითხვა

• კვირის ფრაზა

კვირის აზრი

ერთი მნიშვნელოვანი ცხოვრებისეული გაკვეთილი მინდა გაგიზიარო, რომელიც წლების მანძილზე ვისწავლე.

ძალიან დიდი ხანი დამჭირდა მის დასასწავლად.

ვიღაცისთვის ეს უმარტივესი შეიძლება იყოს, თუმცა ჩემი ხასიათის თავისებურებიდან გამომდინარე, რთული იყო მისი დასწავლა.

რამდენიმე დღის წინ, ალბერ კამიუს ,,შავ ჭირს’’ მივუბრუნდი და იქ ერთი საინტერესო პერსონაჟი აღმოვაჩინე.

ჟოზეფ გრანი.

მერიის თანამშრომელია, რომელიც 22 წელია მოსაწყენი ბუღალტერიით არის დაკავებული

ამ პოზიციაზე მუშაობს იმ იმედით, რომ 22 წლის წინ დაჰპირდნენ ,,სწრაფად დაგაწინაურებთო’’.

კამიუ წერს, რომ ამ 22 წლის მანძილზე ცხოვრება უსაშველოდ გაძვირდა, გრანის ხელფასი კი იგივე რჩებოდა.

შემდეგ ამბობს:

,,მას (ჟოზეფ გრანს) მართლა შეეძლო თავისი უფლებების შეხსენებით თუ არა, რომლებშიც მთლად დარწმუნებული არ გახლდათ, დაპირებაზე დაყრდნობით მაინც მოეთხოვა კუთვნილი.... თუმცა, მოხელეს ვერ გაეხსენებინა, შეპირება რა სიტყვებით იყო გამოთქმული. დაბოლოს, რაც მთავარია ჟოზეფ გრანს ვერ შეერჩია სათანადო სიტყვები... გრანს თუ ვერწმუნებით, მას განსაკუთრებით უჭირდა სიტყვა ,,უფლების’’ დაწერა, რაკი თავადაც არ იცოდა, ზუსტად რას ნიშნავს ეს ცნება. ვერ ბედავდა ვერც ,,დაპირების’’ ხმარებას, რომელიც გულისხმობდა, რომ იგი კუთვნილს მოითხოვდა და მის საქციელს გაბედულს დაამსგავსებდა, რაც სრულიად არ შეესაბამებოდა მის დაბალ თანამდებობას’’.

მოკლედ რომ ვთქვათ, ჟოზეფ გრანი იყო კეთილი და თავმდაბალი კაცი, რომელიც ცხოვრებაში ვერ ითხოვს კუთვნილს ორი მიზეზის გამო:

1. მას ჰგონია, რომ თუ კუთვნილს მოითხოვს, ამით ქვეყანა დაიქცევა და მასზე ცუდს იფიქრებენ. უბრალოდ ერიდება

2. არ იცის როგორ მოითხოვოს. კუთვნილის მოთხოვნას, სიტყვების შერჩევა ჭირდება. კუთვნილის მოთხოვნას აზრების დაწყობა, ალესილი სიტყვა, მწყობრი, მშვიდი და შეუვალი საუბარი ჭირდება.

ამ პერსონაჟთან ჩემი თავი დავაკავშირე.

და ის გაკვეთილი, რომელიც ცხოვრებისგან დავისწავლე არის შემდეგი:

,,თითქმის ყოველთვის უნდა მოითხოვო ის, რაც გეკუთვნის’’.

წლების განმავლობაში ის, რაც თავმდაბლობა მეგონა, უბრალოდ გაუბედავობა აღმოჩნდა.

წლების განმავლობაში ის, რაც თავმდაბლობა მეგონა, უბრალოდ ზედმეტი რევერანსები აღმოჩნდა იმ ხალხის მიმართ, რომელიც შენგან ამ რევერანსებს საერთოდ არ იმსახურებენ.

ზემოთ ვთქვი, ჩემი ხასიათის თავისებურებიდან გამომდინარე ეს გაკვეთილი რთულად დავისწავლე-მეთქი.

ბუნებით მორიდებული და თავმდაბალი ადამიანი ვარ. თუმცა, როდესაც კუთვნილის მოთხოვნაზეა საუბარი, აქ მორიდებულობა და თავმდაბლობა არაფერ შუაშია.

არასწორად არ გამიგო, მორიდებულობა და თავმდაბლობა შესანიშნავია თვისებებია, რომლებსაც არაფრის დიდებით არ დავთმობ და არ შევეცდები შევიცვალო.

როგორც ზემოთ ვთქვი, ,,გაუბედაობას’’ მორიდებულობით და თავმდაბლობით ვფუთავდი. ესენი კი განსხვავდება ერთმანეთისგან.

ამიტომ, ჩემთვის ეს ღირებული გაკვეთილი იყო:

,,თითქმის ყოველთვის მოითხოვე ის, რაც გეკუთვნის!’’

კოლეგა კრეატორი მინდა გაგაცნოთ, მარიამი, რომელიც ჯანსაღი ცხოვრების და წონის კლების ნიშაში მოღვაწეობს ინსტაგრამზე.

შეგიძლია მიწერო მარიამს და პირველი კონსულტაცია ჩემი გამომწერებისთვის უფასო იქნება.

კვირის ვიდეო

ჯორდან პეტერსონის წიგნში ,,ცხოვრების 12 წესი’’ რიგით მე-4 წესი ესე გამოიყურება:

,,თქვენს პროგრესს სხვისას ნუ შეადრით.’’

ამ კონცეფციის შესახებ ვიდეო ჩავწერე.

კვირის ფრაზა

,,თუ კი ადამიანის მოტყუება მოახერხე, ეს სულაც არ ნიშნავს, იმას რომ ის სულელია. ეს ნიშნავს რომ შენ იმაზე მეტად გენდობოდნენ, ვიდრე სინამდვილეში იმსახურებდი’’

ჩარლზ ბუკოვსკი

კვირის ფილმი

ძალიან მომეწონა ეს დოკუმენტური ფილმი.

იონა ჰილმა გადაიღო დოკუმენტური ფილმი თავის ფსიქოლოგზე. ეს ფსიქოლოგი მსოფლიოში აღიარებული პიროვნებაა თავისი გამორჩეული მიდგომებით.

ფილმში ბევრ საინტერესო რამეს აღმოაჩენთ.

კვირის შეკითხვა

ერთი წუთით წარმოიდგინე, რომ აბსოლუტური გარანტია გაქვს იმისა, რომ რა მიზანიც არ უნდა დაისახო უეჭველად მიაღწევ. რა მიზნებს დაისახავდი? რისი მიღწევა გენდომებოდა?

დღეისათვის სულ ეს იყო,

აბა შეხვედრამდე.

ომარ ნოე წერეთელი

პ.ს. წინა გამოცემა თუ გამოგრჩა