N11 📚 8 აგვისტოს ნიუსლეთერი

მოგესალმებით, ❤️‍🔥 

რას ნახავ ამ მეილში?

• წიგნის განხილვა - ,,ლიდერობის მანიფესტი’’;

• 8 უმნიშვნელოვანესი ჩვევა ყოველდღიურობისთვის;

• ფრაზა, რომელიც დაგაფიქრებთ.

წიგნი - ,,ლიდერობის მანიფესტი’’ რობერტ ანდერსონის და უილიამ ადამსის ავტორობით

შევეცდები მოკლე მიმოხილვა გავაკეთო ამ წიგნს. ეს მარტივი საქმე არ იქნება. არ იქნება იმიტომ, რომ წიგნი მარტივი სულაც არ არის.

მიუხედავად იმისა, რომ პიროვნული განვითარების ჟანრის ლიტერატურიდანაა და მოლოდინი გვაქვს, რომ წყალივით უნდა იკითხებოდეს, სულაც არ არის ეგეთი წიგნი.

ძალიან კომპლექსური და ღრმა წიგნია ლიდერობასთან/ორგანიზაციის მართვასთან დაკავშირებით.

პირდაპირ ვიტყვი, რომ დიდად აღფრთოვანებული არ ვიყავი კითხვის პროცესში. უფრო იმიტომ, რომ სულ სხვა მოლოდინი მქონდა წიგნთან დაკავშირებით.

მეგონა უფრო მარტივი და გასაგები საკითხავი იქნებოდა.

სანაცვლოდ მივიღე ის, რომ წიგნი დახუნძლულია ტექნიკური დეტალებით. ბევრი დიაგრამით, სტატისტიკით, მათემატიკური ნინძობებით, პროცენტებით.

ერთი მგონი ტანგესი და ფესვის ამოღება არ შემხვედრია. რავიცი... ძალიან ტექნიკურია ხომ გეუბნებით. განსაკუთრებით წიგნის შუა ნაწილი.

როგორი წიგნია იცით? აი სამეცნიერო კუთხით როცა იკვლევ ლიდერობას და ორგანიზაციების მართვას და რაიმე აკადემიური ნაშრომი გაქვს დასაწერი და ციტატებს ამ წიგნიდან იღებ და ქვემოთ ციტირებებში უშვებ. ეგეთი დონის წიგნია დაახლოებით.

ფაქტია ავტორებს ძალიან დიდი შრომა აქვთ ჩადებული ლიდერობის საკითხის სიღრმისეულად შესწავლაში.

მე შევეცდები გამოვყო რამდენიმე საკითხი, რომლებმაც ჩემი ყურადღება მიიქცია:

1. 

ნამდვილი ლიდერისგან ხალხი ელის დიადი საქმეების კეთებას. ეს მოლოდინი ქმნის ლიდერობის დაპირებას.

ავტორის აზრით არსებობს ორი სახის მოლოდინი ლიდერისგან: ექსპლიციტური - მაგალითად ფინანსური პასუხისმგებლობა; ანგარიშვალდებულება; სტრატეგიის გადაწერა.

და იმპლიციტური - კომპეტენტურობა; სამართლიანობა; მოსმენის უნარი.

ეს ორივე მოლოდინი ხალხს ლიდერის მიმართ ავტომატურ რეჟიმში აქვთ ხოლმე.

2.

ავტორის აზრით, არსებობს ლიდერობის ოთხი უნივერსალური დაპირება: 

1. გეზის განსაზღვრა და მიზნის მიმართულებით მოძრაობა;

2. საქმიანობაში ყველა დაინტერესებული პირის ჩართვა და მათთვის პასუხისმგებლობის დაკისრება;

3. მაქსიმალური ფოკუსის და აღსრულების უზრუნველყოფა;

4. ნდობაზე დაფუძნებული მართვის უზრუნველყოფა

3.

მომეწონა ავტორის შეხედულება, სადაც ის ხაზს უსვამს თავად ლიდერის უწყვეტი პიროვნული განვითარების მნიშვნელობას. 

ანუ ორგანიზაციის წარმატებისთვის მხოლოდ თანამშრომლების განვითარებაზე ზრუნვა არ არის საკმარისი.

საჭიროა ამ ორგანიზაციის ლიდერებიც მუდმივად ვითარდებოდნენ:

,,ეფექტური ლიდერების აღზრდა-განვითარება უმაღლესი ხელმძღვანელი რგოლის ძირითადი სტრატეგიული პრიორიტეტი უნდა იყოს’’.

4. 

ძალიან მომეწონა ავტორის მიერ შემოტანილი ,,ლიდერის 2 თამაშის კონცეფცია’’.

არსებობს ლიდერობის გარე და შიდა თამაში. 

გარე თამაში აღწერს ლიდერის კომპეტენტურობას და ე.წ. გარე ფასადს, ხოლო შიდა თამაში არის ლიდერობის ნამდვილი გააზრება.

შინაგანი თამაში მოიცავს ლიდერების ფასეულობებს, წარმოდგენებს, მსოფლმხედველობას, მენტალურ მოდელებს, მათ რწმენას.

ავტორი გვეუბნება, რომ შიდა თამაში განსაზღვრავს გარე თამაშს. რაც ლოგიკურია. რა სულის მატარებელიცაა ადამიანი, იმას ამჟღავნებს გარეთ.

5.

ავტორის აზრით, ლიდერისთვის ახლომდგომი მტერი არის კონტროლი და მიკრომენეჯმენტი. როდესაც ყველა დეტალის კონტროლი გსურს და დელეგირების უნარი არ გაგაჩნია, ეს ორგანიზაციის მართვაზე უარყოფითად აისახება.

პ.ს. ლიდერობის შესახებ სხვა წიგნიც შემიძლია გირჩიო. ჯოკო უილინკის ,,აბსოლუტური პასუხისმგებლობა’’. ძალიან მიყვარს ეს წიგნი ❣️ . შეგიძლია მისი განხილვა აქ ნახო: აუდიო ვერსია ან საკითხავი ვერსია. 

8 უმნიშვნელოვანესი ჩვევა განსაკუთრებული წარმატებისთვის

ამას წინათ, კოდი სანჩესმა დაწერა პოსტი, სადაც ისაუბრა იმ TOP 13 ჩვევაზე, რომლებმაც მას მილიონები აშოვნინა.

მაგ პოსტიდან ავიღე ინსპირაცია და ჩემეული ვარიანტი მინდა შემოგთავაზოთ იმ 8 ჩვევის, რომლებიც გადამწყვეტი მგონია ყოველდღიურობაში.

მაშ ასე, დავიწყოთ:

1. დაიწყე დღე იმ საქმის კეთებით, რომელიც ყველაზე ნაკლებად გეხალისება

ის პროექტი, რომელიც დიდი ხანია უნდა დაგემთავრებინა გასაყვანი გაქვს ბოლოსკენ.

საუნივერსიტეტო ნაშრომის წერა უნდა დაიწყო, თორემ ვეღარ ასწრებ.

ინგლისურის გამოცდისთვის ესეების წერის ტექნიკა გაქვს დასამუღამებელი.

რავიცი? ათასი ვარიანტი შეიძლება იყოს ისეთი საქმის, რომელიც ჭირივით გვეზარება.

მასზე ლაპარაკის, წუწუნის და ფიქრის ნაცვლად პირდაპირ უნდა ვეკვეთოთ ხოლმე.

ჩემი პრაქტიკიდან ნამდვილად შემიძლია იმის დადასტურება, რომ ყველაზე რთული ამოცანის მოშორება ,,To-Do List’’-იდან მაგარი იდეაა;

2. შეამოწმე შენი ფინანსები ყოველდღე

ყოველდღე ინტერნეტ ბანკში შესვლა დიდად სასიამოვნო პროცესი არ არის.

არავის გვინდა მწარე რეალობის დანახვა. თუ როგორ გარბის ფული. ხანდახან ობიექტური, ხანდახან სუბიექტური (სულელური) მიზეზით.

თუმცა, ფინანსების რუტინული შემოწმება ჩვენი ცნობიერების ამაღლებას იწვევს!

უკეთესად ვხვდებით სად შეგვიძლია ფულის დაზოგვა და სად ვფლანგავთ მას ქარაფშუტულად.

3. განერიდე შეხვედრებს, რომლებიც 1 საათზე მეტხანს გრძელდება

გახსენდება რომელიმე ოფიციალური შეხვედრა, რომელიც 1 საათზე მეტხანს გრძელდება და პროდუქტიულია? მე არა. დროის ჭამის მეტი არაფერი ხდება მსგავს შეხვედრებზე.

4. კიბეები>ლიფტებს

როგორც პირდაპირ, ასევე გადატანითი მნიშვნელობით. არ უნდა ავარიდოთ თავი გამოწვევებს. იოლი გზა ყოველთვის არ არის გამოსავალი.

5. ჩვენი ,,To-do List’’ მოქნილი უნდა იყოს

არ არის სავალდებულო მკაცრად გაწერილი გეგმა-გრაფიკი გვქონდეს თუ რას ვსაქმიანობთ კონკრეტულ დღეს.

გამოწვევების პარალელურად ჩვენი დღის გეგმა მოქნილი უნდა იყოს.

ოღონდ არა ისე, რომ პრინციპულად მნიშვნელოვანი საქმეები გავაუქმოთ და გადავდოთ.

6. გაღვიძებიდან 1 საათი მაინც მაქსიმალური დისტანცია სოც. ქსელებიდან

ამაში ყველა ვართ დამნაშავე.

მე მაგალითად, გაღვიძებისთანავე უაზრო სქროლვა თუ დავიწყე და ტელეფონმა შემიტყუა, ესე მგონია, დღე უკვე დავკარგე.

დილაადრიან ინტერნეტის ნაცვლადსხვა მრავალი აქტივობით დაკავება შეიძლება:

· წიგნის წაკითხვა;

· ვარჯიში;

· ფეხით სიარული;

· ლოცვა;

· მედიტაცია;

· ძაღლის გასეირნება;

· სიწყნარეში ყავის დალევა.

დილას მე რასაც ვამუღამებ არის გაღვიძებისთანავე ვცდილობ წიგნი გადავშალო და ერთი 20 გვერდი მაინც წავიკითხო.

დილის ადრეული საათები იდეალურია კითხვისთვის. ყველას ძინავს, არავინ გაწუხებს, მესიჯი არ მოდის, არავინ გეძახის. სრული იდილიაა.

7. ,,არ იმუშავებს ძმა’’ VS ,,რა გავაკეთოთ იმისთვის რომ იმუშავოს’’

ხედავთ განსხვავებას ხო?

ხშირად გვითქვამს ჩვენი თავისთვის, რომ ,,ეს არ იმუშავებს’’, ,,არ გაამართლებს’’.

და მერე გვინახავს ზუსტად მსგავს იდეას სხვა როგორ ახორციელებს და გადასარევად ამუშავებს.

ამიტომაც, სწორი კითხვა, რომელიც უნდა დავსვათ არის შემდეგი - ,,რა უნდა გავაკეთო იმისთვის რომ იმუშავოს და დაგლიჯოს ყველაფერი?’’.

ზუსტადაც ოპტიმიზმმა უნდა გვაკეთებინოს დიდი საქმეები!

8. იყავი ოთახში ყველაზე სულელი ადამიანი.

ამ 8 თეზისიდან ყველაზე მნიშვნელოვანი პუნქტია.

თუ ისეთი ხალხის გარემოცვაში ხარ, სადაც შენ ხარ ყველაზე ჭკვიანი და უნარიანი, ეს იმას ნიშნავს, რომ ვერ განვითარდები.

როგორც ამბობენ, ,,თუ ოთახში ყველაზე ჭკვიანი ადამიანი შენ ხარ, ესე იგი არასწორ ოთახში იმყოფები’’.

როდესაც ყველაზე სუსტი ხარ ჯგუფში, ეს იმას ნიშნავს რომ შენს ირგვლივ არის უამრავი ადამიანი, რომელთაგანც შეგიძლია თავმდაბლად ისწავლო.

ეს ძალიან ბევრ რამეში გვეხმარება:

1. ვხდებით უფრო თავმდაბალი;

2. ვსწავლობთ, რომ კონკრეტულ დარგში ყოველთვის არის და იქნება ვიღაც ჩვენზე უკეთესი. და ეს ნორმალურია. სულ რომ მაგარი ენტერპრენერი გახდე და მილიონები იშოვო, თამასად გყავს ილონ მასკი და უორენ ბაფეტი. და მაგათთან შედარებით მაინც ჭიანჭველა იქნები...

3. ვსწავლობთ იმას, რომ იმის სანაცვლოდ გვშურდეს ჩვენზე უკეთესის, ჩვენ მისგან ვისწავლით და ღრუბელივით შევისრუტავთ ცოდნას;

თუ ხარ ისეთ გარემოცვაში, სადაც ხალხი შენზე ორჯერ ან სამჯერ მეტად განვითარებულია (განათლების დონით; ფინანსებით; სულიერებით და ა.შ.) ჩათვალე ძალიან დიდი ფუფუნებაში ხარ. 

ფრაზა, რომელიც დაგაფიქრებთ

,,თანამედროვე, მუდმივად მზარდი გაურკვევლობის ეპოქაში, რომელიც ელვის სისწრაფით მოძრაობს, დეტალურმა რუკამ შეიძლება უღრან ტყეში შეგიტყუოთ, საიდანაც თავის დაღწევა ძალიან ძვირი დაგიჯდებათ. კარგი კომპასი კი ყოველთვის მიგიყვანთ იქ, სადაც გინდათ, რომ მიხვიდეთ. ეს არ ნიშნავს იმას, რომ დაიწყოთ საქმე და სრულიად არ გქონდეთ წარმოდგენა იმაზე, თუ საით მიდიხართ. უბრალოდ, ასეთი ხერხით შეიძლება ვიაროთ იმ გზით, რომელიც წინასწარ არ არის სწორხაზოვნად განსაზღვრული, მაგრამ თქვენ მაინც უფრო წარმატებითა და დროულად მიხვალთ დანიშნულების ადგილამდე, ვიდრე წინასწარ ნაბიჯ-ნაბიჯ, მკაცრად განსაზღვრული გზით’’ - წიგნიდან ,,იკიგაი’’.

დღეისთვის სულ ეს იყო.

შეგიძლია პასუხი დამიბრუნო ამ მეილზე თუ რაიმე შეკითხვა გაქვს და მოსაზრება. ყველა მეილს ვკითხულობ. 🙏 

პ.ს. იუთუბზეც დავიწყე მოღვაწეობა. ვცდილობ ყველა პლატფორმა ნელნელა ავითვისო. აქ შეგიძლია ნახო ჩემი არხი.